On aılyq qorytyndy oıdaǵydaı

Premer-Mınıstr Kárim Másimovtiń tóraǵalyǵymen ót­ken keshegi Úkimet otyry­synda elimizdiń áleýmettik-ekonomıka­lyq damýynyń on aılyq qorytyndysy qaral­dy. Ony oıdaǵydaı dep aı­týǵa ábden bolady. Atalǵan másele boıynsha baıan­dama jasaǵan Ekonomıkalyq damý jáne saýda mınıstri Qaırat Kelimbetovtiń aıtýynsha, jyl basynan beri el ekonomıkasynyń damýy jaǵymdy aǵymdar boıyn­sha júrip keledi. On aılyq qory­tyndy nátıjesinde ótken jyl­dyń osy merzimimen salys­tyr­ǵanda, ekonomıkanyń mańyzdy degen alty arqaýlyq salasynda damý kórsetkishi 7,2 paıyzdy qu­ra­ǵan. Sóıtip, álemdik ekonomı­ka­nyń jandanýy, eksportqa baǵyt­tal­­ǵan taýarlar baǵasynyń tu­raq­­ty­lyǵy, el ishindegi surany­s­tyń artýy osyndaı kórsetkishke qol jetkizýge negiz bolǵan. Al ót­ken toǵyz aıdyń ishinde ishki jalpy ónim kólemi byltyrǵy jyldyń osy merzimimen salystyrǵanda 7 paıyzǵa arta túsken bolatyn. Q.Kelimbetov óz baıandama­syn­da on aıda ónerkásip óniminiń kólemi 4 paıyzǵa, al aýyl sha­rýa­shylyǵy ónimderiniń jalpy kó­le­mi 22,8 paıyzǵa ulǵaısa, qu­rylys jumystarynyń kólemi 2,8 paıyzǵa, kólik qyzmetiniń kólemi 6,5 paıyzǵa, baılanys qyzmeti 17,8 paıyzǵa, bólshek saýda 12,7 paıyzǵa ulǵaıa túskenin aıtty. Sondaı-aq, aǵymdaǵy jyldyń qańtar-qyrkúıek aılaryndaǵy taý­ar eksportynyń ósimi ótken jyl­dyń osy merzimimen salys­tyr­ǵanda 49,9 paıyzǵa artyp, 65,8 mıllıard dollardy quraǵan. Munyń ishinde ımport 26,1 mıllıard dollar bolsa, eksport 39,8 mıllıard dollar bolǵan. Respýblıkalyq jáne jergilikti bıýdjetterdiń oryndalý ná­tı­jesi de jaman emes. Osy boı­ynsha baıandama jasaǵan Qarjy mınıstri  Bolat Jámishev elimiz­diń halyqaralyq rezervteri byl­tyr­ǵy kezeńmen salystyrǵanda 26,6 paıyzǵa artyp, 75 mıllıard AQSh dollaryn quraǵandyǵyn, onyń ishinde ulttyq qordyń aktıvteri 42,4 mıllıard dollarǵa jetkendigin aıtyp ótti. Sondaı-aq, Ulttyq banktiń altyn valıýta qory 12,6 paıyzǵa artyp, 32,6 mıllıard dollardy quraǵan eken. Elimizde ındýstrııalandyrý kar­tasy aıasyndaǵy jobalardyń júzege asyrylýy el ekono­mı­ka­syna oń yqpal tıgizgen. Qazirgi  kúni jalpy quny 9 mıllıard teńgeni quraıtyn 234 ındýs­trııa­lyq joba iske qosylǵan. Sonyń ishinde bıylǵy jyldyń basynan beri 82 ındýstrııalyq joba iske qosylyp, 29 myń jańa jumys or­nynyń ashylýyna yqpal etip otyr. Eger óńirler jaǵdaılaryna ke­ler bolsaq, ónerkásiptik ón­di­ristiń damýy elimizdiń barlyq aımaǵynda da kórinis berip otyr. Sonyń ishinde eń joǵarǵy ósim kólemi Astana qalasynda (ósim kólemi 30,5 paıyz), Jambyl oblysynda (32,3 paıyz), Aqmola oblysynda (17,9 paıyz), Almaty qalasynda (15 paıyz) baıqalǵan. Al óńirlerge kelip jatqan ın­ves­tısııalardyń joǵary kólemi Astana qalasynda (29,1 paıyz), Shy­ǵys Qazaqstan oblysynda (33,6 paıyz), Qaraǵandy obly­syn­da (16,4 paıyz) kórinis berdi. Suńǵat ÁLIPBAI.