Memleket basshysy Nursultan Nazarbaev Joǵarǵy Sot Tóraǵasy Bektas Beknazarovty qabyldady, dep habarlady Qazaqstan Respýblıkasy Prezıdentiniń baspasóz qyzmeti.
B.Beknazarov Memleket basshysyna sot tóreligin odan ári jetildirý jáne sot reformasyn tereńdetý jóninde qabyldaǵan sharalar týraly habarlady.
Joǵarǵy Sot Tóraǵasy Prezıdentke aǵymdaǵy jyldyń 10 aıynda sot tóreligin júzege asyrýdyń nátıjeleri, sot júıesin nyǵaıtý jónindegi sharalar, ekonomıkalyq sottar jumysy, sondaı-aq Qazaqstanda sot isin júrgizýdi damytý máselesinde halyqaralyq yntymaqtastyq týraly baıandady.
B.Beknazarov qylmystyq sot isin júrgizýdi izgilendirý boıynsha júzege asyrylǵan sharalar qaýipti emes qylmys jasap sotty bolǵan qazaqstandyq azamattardyń sanyn edáýir tómendetkenin atap ótti.
Sonymen qatar, Joǵarǵy Sot Tóraǵasy Prezıdentti barlyq oblys ortalyqtarynda jetkinshekterdiń isteri boıynsha sottardyń qurylýy týraly habardar etti. Kámeletke tolmaǵandardyń isteri boıynsha mamandandyrylǵan sottardyń qyzmeti sot sheshiminiń anaǵurlym dáleldi qabyldanýyna múmkindik týǵyzyp, quqyq tártibin buzǵan jetkinshekterdi qaıta tárbıeleý jáne túzetý úderisine oń yqpalyn tıgizetin bolady.
Azamattardyń joǵary deńgeıde quqyqtyq qorǵalýyn arttyrý, sot rásimderiniń qoljetimdi jáne ashyq bolýy maqsatynda sondaı-aq tájirıbege elektrondyq sot isin júrgizý engizilýde.
Memleket basshysy Joǵarǵy Sottyń jáne barlyq sot tóreligi júıesi jumysynyń tıimdiligin arttyrý máseleleri jóninde birqatar naqty tapsyrmalar berdi.