Arqa tórindegi ajarly qala

«Egemen Qazaqstannyń» arnaıy jobasy: Jasampazdyq jemisteri Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi. «Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady.

Tómende Aqmola  oblysynyń Stepnogor qalasynan fotoreportaj berilip otyr.

Soltústik Qazaqstandaǵy ýran kenishterin ıgerý maqsatynda qurylǵan Stepnogor qalasy Aqmola oblysynyń iri ındýstrııalyq ortalyǵy sanalady. Máskeýdiń tikeleı ámirindegi shahar jabyq rejimde jumys istegendikten, KSRO qu­la­symen irgesi sógilip, kúıreı bastaǵan. Qalany nárlendirýshi qýatty kásiporyndardyń ózi lezde bankrot bolyp jatty. Áıtkenmen, ol tez esin jıdy. Sondyqtan, Stepnogordi táýelsizdi­gimiz­diń eleń-alańyndaǵy surapyl syndarǵa tótep bergen, el basshylyǵynyń salıqaly saıasaty­nyń, jurtshylyqtyń tabandylyǵy men qajyr-qaıratynyń úlgisin beınelegen qala deýimizge bolady. Elbasy N.Nazarbaevtyń Qazaqstan hal­qy Assambleıasynyń 10 jyldyq merekesindegi saltanatqa arnaıy qatysyp, 17 ulttyń ókili turatyn stepnogorlyqtarǵa tutqaly mindetter qoıýy da jalpy serpiliske qýat bergeni anyq. Stepnogorde mashına jasaý, taý-ken, metal­lýrgııa, hımııa óndirisi, energetıka, bıotehnologııa jaqsy damyǵan. Jyl basynan beri munda 47362,1 mıllıon teńgeniń taýarly ónimi óndiril­di. Bul – ótken jylǵy deńgeıdiń 134,4 paıyzy. Bylaısha aıtqanda, qala oblys ónerkásibiniń 40 paıyzdyq úlesin ıemdenedi. Osynaý shyraıly shahardaǵy «Taý-ken kombınaty» JShS, «Podshıpnık zaýyty» AQ, «Selıngormash», «Taý-ken jabdyqtary zaýyty», «Djet-7» JShS men «Qazaqaltyn taý-metallýrgııa konserniniń» irgeli tabystary baıtaq elimizge keńinen málim. Sondaı-aq, sońǵy jyldary Stepnogor zama­na­lyq kásiporyndarymen álem nazaryna iligip otyr. «Saga Krık Gol Kompanı» Dore qoryt­pa­syn­daǵy altyn óndirse, «Qunarly» men «Tep­lıch­nye tehnologıı Kazahstana» ozyq úlgidegi jylyjaılarynyń birinshisi jylyna 6 mıllıon dana qalampyr gúlin ósirip, ekinshisi, el das­tar­qanyna jylyna 1832 tonna qyzanaq, qııar, askók­ usynýda. Innovasııalyq tehnolo­gııadaǵy mal dárigerlik bıologııalyq dári-dármekter, mal men qusqa arnalǵan belok-vıtamın-mıneraldy qospalar, ósimdikterdi hımııalyq qorǵaý qural­da­ry, spırt joǵary suranystaǵy ónimder sana­la­dy. Indýstrııalyq damý baǵdarlamasy sheń­berinde paıdalanýǵa berilgen «Arystan» JShS jylyna aýqymy 20-1200 mm. 25 myń tonna qu­byrlar shyǵarýda. О́nim túrin kóbeıtý maqsatyn­da taǵy da alty tehnologııalyq jelini iske qosý josparlanǵan. Bul 2012 jyldyń sońyna qaraı joǵarydaǵy kórsetkishti 35 myń tonnaǵa jetkizýge múmkindik beredi. Osynyń nátıjesinde ju­mys ornynyń sany 50-ge kóbeıip, 300 adam tu­raq­ty jalaqymen qamtamasyz etiledi. Buǵan qo­symsha, «Jylyna 180 myń tonna kúkirt qysh­qy­lyn shyǵaratyn zaýytty qaıta qurý», «Zvezdnoe ken ornynyń Shyǵys bóligin ıgerý», «Teplıch­nye tehnologıı» JShS-da «Jylyna 60 tonna balyq pen ashyq alańda 12 myń tonna kókónis óndirý» ınvestısııalyq jobalary qolǵa alynǵan. Qaladaǵy 22 sharýa qojalyǵy 36826 gektar jer­di kútip, baptap, ıgilik jınap otyr. Bul ónim­derdi qaıta óńdeýde «Moltorg» JShS ozyq keledi. Kásiporyn qazirdiń ózinde 41 mıllıon teń­ge­niń 400 tonna ónimin tutynýshylarǵa jetkizdi. Shaǵyn bıznes qurylymdarynyń sany 4 myńnan asady. Osynyń arqasynda sońǵy tórt jylda 7 myńnan astam adam turaqty nápaqa taýyp júr. «Jol kartasymen» áleýmettik jumys oryn­daryn qurýǵa, qaıta daıarlaýǵa 50 mıllıon teńge ıgerilse, bıyl bastalǵan jańa baǵdarlama aıa­syn­da 167 adamdy eńbekke tartý qarastyrylýda. Stepnogorlyqtar 32 bilim berý mekemesimen, «Halyqtyq» ataǵy bar 10 shyǵarmashylyq orta­lyǵymen maqtana alady. Bógenbaı batyr atyndaǵy  sport mektebiniń túlegi, halyqaralyq dárejedegi sheber Irına Nekrasova Pekın Olımpıadasynda alǵash­qy kúmis medaldi jeńip alyp, kók týy­myzdy aspandatqany barshamyzdyń mereıimizdi ósirdi. Arnaıy betti daıyndaǵan «Egemen Qazaqstan» gazetiniń Aqmola oblysyndaǵy menshikti tilshisi Baqbergen AMALBEK.