Nıý-Iorkte Birikken Ulttar Uıymynyń shtab-páterinde Memleket basshysy Nursultan Nazarbaevtyń tóraǵalyǵymen Qaýipsizdik Keńesiniń «Jappaı qyryp-joıatyn qarýdy taratpaý: sharalar men senim» taqyryby boıynsha joǵary deńgeıdegi pikirtalas ótti.
Jıyndy ashqan Elbasy Qazaqstannyń BUU Qaýipsizdik Keńesindegi basym baǵyttaryna toqtaldy. Sonymen qatar Prezıdent Qazaqstan 2018 jylǵy qańtardaǵy tóraǵalyǵy merziminde tabysty jumys istep jatqanyn atap kórsetti.
«Biz Qazaqstannyń BUU Qaýipsizdik Keńesiniń turaqty emes múshesi bolyp saılanýyn jáne búgingi tóraǵalyq qyzmetimizdi álemdik qoǵamdastyqtyń elimizge jáne onyń beıbitshil saıasatyna degen senimi dep bilemiz. Ortalyq Azııanyń bul mártebeli qyzmettegi birinshi memleketi retinde biz óńirimizdegi halyqtardyń Dúnıejúzilik uıymnyń osy mańyzdy «únine» aınaldyq», dedi Prezıdent. Nursultan Nazarbaev Qazaqstannyń BUU Qaýipsizdik Keńesindegi birinshi jyly ótkenin aıtyp, elimizdiń Keńestiń kúnt tártibindegi ózekti máselelerdi sheshýge qatysý barysynda barynsha belsendi, konstrýktıvti jáne ádil bolýǵa tyrysqanyn jetkizdi.
«Aýǵanstan/Talıban, ILIM/DAISh, Ál-Kaıda jáne Somalı/Erıtreı jónindegi komıtetterdi basqara otyryp, olardyń jemisti qyzmet etýine óz úlesimizdi qosyp kelemiz», deı kele Nursultan Nazarbaev álemdik qoǵamdastyq ‒ alýan túrli jáne kóp qyrly sıpaty arqyly kúsheıe túsken birtutas organızm ekenin aıtty. «Ol jer betindegi ulttar men halyqtar arasynda teńgerim men úılesim bolǵan kezde ǵana alǵa basyp, damı alady. Sol sebepti biz quqyq ústemdigine negizdelgen qaýipsiz álem men ádiletti álemdik tártipke birlese qol jetkizýimiz kerek. Bul iste BUU Qaýipsizdik Keńesiniń róli zor jáne oǵan tarıhı mıssııa júkteleteni de sózsiz», dedi Memleket basshysy.