Osydan biraz ýaqyt buryn oblysymyzdyń Úrjar aýdanynyń Sholpan aýylynda birneshe balanyń sary aýrýǵa shaldyqqany, ıaǵnı A vırýstyq gepatıti aýrýyn juqtyrǵany týraly aqparat taraǵan bolatyn. Atalǵan aýyldyń turǵyny Indıra Jánibekova respýblıkalyq telearnalardyń birine bergen suhbatynda 2017 jyly jeltoqsan aıynda kóz jumǵan 11 jastaǵy qyzy aýdan dárigerleriniń salǵyrttyǵynan aýrýyn asqyndyryp alyp, osy aýrýdan qaıtys bolǵanyn aıtqan edi.
Úrjar aýdandyq aýrýhanasynyń bas dárigeri Jeksenbaı Tleýberlın qaıǵyly oqıǵadan keıin aýyldaǵy 139 oqýshyǵa ekpe jasalǵanyn, 800-ge jýyq turǵynnan saraptama alynǵanyn, bul aýrý 49 adamda tirkelip, olardyń 25-i aýrýhanada em qabyldaǵanyn jetkizgen edi. Alaıda 16 qańtar kúni osy jaǵdaıǵa baılanysty arnaıy brıfıng ótkizgen oblystyq densaýlyq saqtaý basqarmasy basshysynyń orynbasary Raıfa Safıollınova A vırýstyq gepatıti 49 balada anyqtaldy degen derekti joqqa shyǵaryp, kóz jumǵan oqýshy joǵaryda atalǵan vırýstyq syrqattan emes, baýyr nekrozynan qaıtys bolǵanyn málimdedi. «Barlyǵy 46 bala tekserýden ótken, onyń 25-i dıagnostıkadan ótý úshin Úrjar aýdandyq aýrýhanasynyń juqpaly aýrýlar bólimine jatqyzylǵan. Sonyń tek 12-sinde atalǵan dıagnoz dáleldengen. Onyń 11-i - oqýshy, bireýi - úsh jastaǵy bala. A vırýstyq gepatıti 2017 jyldyń qyrkúıek aıynan beri ártúrli aılarda ara-tura tirkelip otyrǵan. Aýyrǵan adamdarmen baılanys jasaǵan balalardyń barlyǵyna vaksınasııa jasalyp, Sholpan aýylynda 140 adamǵa ekpe salyndy», - degen-di basqarma basshysynyń orynbasary.
Sholpan aýylyndaǵy sanıtarlyq-epıdemıologııalyq jaǵdaı Densaýlyq saqtaý mınıstrliginiń de qatań baqylaýynda. Bul jaıynda Astanadaǵy Ortalyq kommýnıkasııalar qyzmetinde baspasóz ókilderine arnap ótkizgen brıfıngte atalǵan mınıstrliktiń Qoǵamdyq densaýlyq saqtaý komıtetiniń tóraǵasy Jandarbek Bekshin jan-jaqty túsinikteme berdi. «Densaýlyq saqtaý mınıstrliginiń aýmaqtyq bólimsheleri AVG barlyq oshaqtaryna epıdemıologııalyq tekserý jáne Sholpan aýylynyń dárigerlik ambýlatorııasyna, Júzaǵash orta mektebine jospardan tys tekserý júrgizdi. Mamandarǵa tájirıbelik kómek kórsetý jáne ótkiziletin is-sharalardyń sapasyn baqylaý maqsatynda ShQO boıynsha Qoǵamdyq densaýlyq saqtaý departamenti mamandarynyń Úrjar aýdandyq basqarmasyna shyǵýy uıymdastyryldy. Mektep jáne úı oshaqtarynan 62 aýyz sý synamalary alyndy. Oqý ornynda, úı oshaqtarynda qorytyndy zalalsyzdandyrý jumystary, mekteptiń sýmen jabdyqtaý júıesin, oshaqtarda barlyq sý saqtaıtyn syıymdylyqtardy jýý jáne zalalsyzdandyrý júrgizildi. Aýyz sý synamalaryn qaıta alý jáne keıinnen qaıta alý kezindegi nátıjesi teris boldy», - degen komıtet tóraǵasy qazirgi ýaqytta mektepte aýyz sýdy paıdalanýǵa tyıym salynǵanyn, mektep oqýshylary bótelkedegi aýyz sýdy paıdalanyp jatqanyn, barlyq buqaralyq mádenı-sporttyq is-sharalar toqtatylyp, oqytýdyń kabınettik júıesi alynyp tastalǵanyn jetkizdi. «Týyndaǵan jaǵdaıdy anyqtaý úshin Shyǵys Qazaqstanǵa komıssııa shyqty, onyń quramyna Densaýlyq saqtaý mınıstrliginiń ókilderi, Asfendııarov atyndaǵy QazUMÝ jáne Sanıtarııalyq-epıdemıologııalyq saraptama ǵylymı-praktıkalyq ortalyǵynyń sarapshylary kirdi. Bul jaǵdaı mınıstrliktiń baqylaýynda», - dedi J.Bekshın.
Úrjar aýdanynyń ákimi Serik Zaınýldınmen telefon arqyly sóıleskenimizde jaǵdaıdyń tolyq baqylaýǵa alynǵanyn, mektepte sabaq toqtatylmaǵanyn, 2017 jyldyń jeltoqsan aıynda kóz jumǵan balanyń ólimine qatysty aýdandyq prokýratýra qylmystyq is qozǵaǵanyn aıtty. Oblystyq densaýlyq saqtaý basqarmasynyń basshysy Marat Shoranovqa habarlasqanymyzda qazir Sholpan aýylynda respýblıkalyq komıssııa jumys istep jatqanyn, qalyptasqan jaǵdaıǵa oraı oblysta arnaıy jumys toby da qurylǵanyn jetkizdi. «О́kinishke qaraı qazir Sholpandaǵy jaǵdaıǵa baılanysty tekserilmegen derekter de tarap jatyr. Jeltoqsanda kóz jumǵan oqýshynyń «Ostryı gepatıt» degen dıagnozben qaıtys bolǵandyǵy aıtylyp jatyr. Balanyń qaıtys bolǵanyn dáleldeıtin anyqtamanyń kóshirmesi de tarap ketipti. Ony biz joqqa shyǵarmaımyz. Osyndaı dıagnozben qaıtys bolǵany ras. Biraq bul aýrý men A vırýstyq gepatıti ekeýi eki bólek nárse ekenin uǵynýǵa tıispiz. A vırýstyq gepatıtimen aýyrǵan adamda munshalyqty asqyný bolmaıdy», - deıdi basqarma basshysy.
Al qaıtys bolǵan balanyń anasy Indıra Jánibekova ne deıdi? Biz ol kisimen telefon arqyly sóılesip, pikirin bildik. Aıdyń, kúnniń amanynda baýyr eti balasynan aıyrylǵan qaraly ana byltyr Sholpan aýylynda eń alǵash sary aýrý eki balada anyqtalǵanda karantın jarııalanyp, qaýipsizdik kúsheıtilgende mundaı qaıǵyly jaǵdaı oryn almas edi dep sanaıdy. Aýyldaǵy dárigerlerdiń óz jumysyna salǵyrt qaraǵanyn da joqqa shyǵarmaıdy. «Baýyrdyń jetispeýshiligi deıdi. Balam emhanada esepte turmaǵan. Aýyldaǵy dárigerlerdiń aldynda týǵan kezinen bergi kartochkasy jatyr. Ekpelerdi ýaqytynda alyp júrgen. Balam aýrý bolsa buryn nege baıqamaǵan, nege aıtpaǵan? Sheshem aýyldaǵy dárigerlerge qyzymnyń aýyryp, mazasyzdanyp turǵanyn aıtqanda dárigerlerdiń eshqaısysy úıge kelmegen. Kelmegen soń amalsyzdan ózderi barǵan. Sol kezdegi dárigerlerdiń myna áreketin túsiner emespin. Sheshemniń aıtýynsha, qyzym sıstema qabyldap jatqanda kishi dáreti qysqan eken. Sol kezde aýyl dárigerleri sıstemasyn julyp tastap, daladaǵy dárethanaǵa jibergeni, onymen qoımaı saraptamaǵa zárin ala kelýdi tapsyrǵany qaı sasqany? Sonda aýyldaǵy emhanada qarapaıym gorshoktyń óziniń joq bolǵany ma? Sondyqtan dárigerler óz bastaryn arashalaý úshin jalǵan aqparat taratyp otyr dep oılaımyn. Meniń balam sary aýrýdan qaıtys boldy», - degen I.Jánibekova bolashaqta mundaı jaǵdaı qaıtalanbaýy úshin aldyn alý jumystaryn júrgizip, aýyldy jerlerdegi dárigerlerdiń biliktiligin arttyryp, jaýapkershiligin kúsheıtý qajettigin aıtady.
Azamat QASYM, «Egemen Qazaqstan»
Shyǵys Qazaqstan oblysy