Zúlfııa Ǵabıdýllına elimizge ǵana emes, ózge memleketterge de tanys esim. Taǵdyr taýqymetine moıymaı, aǵysqa qarsy júzgen qaısar qyzdyń erligi kópke úlgi. Onyń osy qasıeti qazaq elinen shyqqan tuńǵysh Paralımpıada chempıony dárejesine jetkizdi, «Qazaqstandaǵy 100 jańa esimniń» qataryna qosty.
Álemge Áýlıeatanyń ǵana emes, qazaq eliniń qaısarlyǵyn áıgilegen Zúlfııa sport salasyndaǵy eren qubylys. Bes jasynda motosıkl júrgizýshisi qaǵyp ketken qarshadaı qyzdyń omyrtqasy jaraqattanyp, sol kezde dene shynyqtyrýmen aınalysady. Bir jyl boıy aýrýhana tósegine tańylyp, aıaq-qoly jaraqattanǵan ol balalyqtyń bal dámin sezine alǵan joq. Alaıda aldyna ómirlik maqsat qoıa bilgen Zúlfııa 1998 jyldan bastap júzýdi tańdaıdy. Sodan beri sporttan qol úzbeı, túrli jetistikterge jetip keledi. Al 2007 jyldan beri Zúlfııany elimizge eńbegi sińgen bapker Sattar Beısembaev jattyqtyrady. Sol jyldan bastap ol kásipqoı sportqa birjola kirisedi.
Aldyna úlken maqsat qoıa bilgen adam oǵan jetedi. Zúlfııa Ǵabıdýllına búginde óz eńbegimen bıikke jetkenimen, budan da bıikke jetýdi maqsat etedi. Múmkindigi shekteýli bolsa da arbaǵa otyryp alyp jaýyn-shashynǵa da qaramaı, jattyǵý zalyna baryp júrip el abyroıyn asyrǵan bıikti baǵyndyrdy. Endi ol Qazaqstannan shyqqan eki dúrkin Paralımpıada chempıony bolýdy armandaıdy. Ol úshin elimizdiń kók týyn álem aspanynda jelbiretýden asqan baqyt joq.
Zúlfııanyń ómir joly túrli jetistikterge toly. 2014 jyly Inchhonda ótken paraazııalyq oıyndarda altynnan alqa taǵyndy. Al 2015 jyly Shotlandııanyń Glazgo qalasynda ótken álem chempıonatynda eki birdeı qola medaldi ıelendi. Kelesi jyly Brazılııa memleketiniń Rıo qalasynda ótken Paralımpıada oıyndarynda jeńimpaz atanyp, tórtkúl dúnıege memleketimizdiń mereıin ústem etti. Sondyqtan Zúlfııa Ǵabıdýllına tirek qımyl apparaty zaqymdanǵan sportshylar arasynda tuńǵysh jeńimpaz bolyp, el tarıhynda qaldy.
Ol búginde Taraz qalasynda turady. Aldyna el mereıin asqaqtatýdy maqsat etip qoıǵan Zúlfııa qazir de daıyndyq ústinde. Elbasynyń ózi ony jarqyn jeńisimen quttyqtap, tabys tilegeni el esinde. Eliniń mereıin asqaqtatqan oǵan ótken jyly Jambyl oblystyq ákimdigi úı salyp berip, qoldaý kórsetti. Elim degen er minezdi qaharman qyzdyń qaısarlyǵy shynynda da tańdantpaı qoımaıdy.
Hamıt ESAMAN, «Egemen Qazaqstan»
Jambyl oblysy