...bir myń túp aǵash egildi
Kúzde Pestroe kóliniń jaǵasynda «Soltústik juldyzy» keshendi saıabaǵy boı kóterip, Elbasy saltanatty túrde ashqan bolatyn. Sol joly 70-ke jýyq shyrsha, terek kóshetteri egilgen edi. Jýyrda oblys ákimi Serik Bilálov bastaǵan qala, aýdan ákimderi, Qazaqstan halqy Assambleıasynyń músheleri «Jasyl jelek – ult densaýlyǵy» aksııasy aıasynda osynda jóke aǵashtarynyń kóshetterin otyrǵyzdy.
Táýelsizdiktiń 20 jyldyǵyna arnalǵan shara bastalǵaly demalys saıabaqtaryna bir myńnan asa aǵash egilip, jasyl jelekke orandy.
О́mir ESQALI,
Petropavl.
...reanımobıl kólikteri tapsyryldy
Jaqynda Shyǵys Qazaqstan oblysynyń ákimi Berdibek Saparbaev birqatar qalalyq jáne aýdandyq densaýlyq saqtaý bólimderiniń basshylaryna medısınalyq jedel járdem kólikteriniń kiltterin tapsyrdy. Oblystyń aýmaǵy úlken, joly uzaq, sondyqtan keıde jol kólik apaty bolyp turady. Mine, sondaı kezde atalmysh kólikter der kezinde jetip, jaraqat alǵandarǵa kómek kórsetedi.
Quny 121 mıllıon teńge turatyn 9 reanımobıl kóliginde qajetti qural-jabdyqtardyń, dári-dármek, basqa da qajetti zattardyń bári bar. О́ńir basshysy Aıagóz, Zaısan, Zyrıan aýdandarynda dıagnostıkalyq ortalyqtyń ashylatynyn aıta kelip, kólikterdiń aldaǵy ýaqytta da barlyq aýdandarǵa beriletinin aıtty.
Ońdasyn ELÝBAI,
Shyǵys Qazaqstan oblysy.
...kartop qoımasy
Azyq-túlik qaýipsizdigin qamtamasyz etý maqsatyndaǵy jumystar jalǵasyp keledi. Osy maqsatta «Bıznestiń jol kartasy-2020» baǵdarlamasynyń birinshi baǵytymen aýyl sharýashylyǵy salasyndaǵy tyń umtylys nátıjesinde aımaqtardaǵy taýar óndirýshilerdiń jumysyn jeńildetetin bastamalar kóptep kezdesetini jaıly aıtqan abzal.
Qapshaǵaı qalalyq aýmaǵyndaǵy Sheńgeldi eldi mekeninde syıymdylyǵy 3 myń tonna bolatyn kartop saqtaıtyn qoıma paıdalanýǵa berildi. Atalǵan jobanyń tııanaǵyn keltirgen «JetisýAgro» seriktestigi oblystaǵy kartop pen kókóniske qatysty kúrdeli jaǵdaıdyń kúrmeýin tarqatýdy alǵa qoıǵan. Osylaısha bankten 28 mln. teńge nesıe alyp, qoımaǵa qajetti qural-jabdyqtardy Gollandııadan ákelgen.
Memlekettiń qoldaýymen salynǵan qoımada saqtalǵan ónim qala turǵyndarynyń azyq-túlikke degen suranysyn qanaǵattandyratyn bolady. Nesıeni óteýde de jeńildik bar.
Kúmisjan BAIJAN,
Almaty oblysy.