«Astana» fýtbol klýby el tarıhynda tuńǵysh ret Eýropa Lıgasynyń 1/16 kezeńine joldama aldy. Osyǵan oraı jýyrda ótetin «Sportıngke» qarsy kezdesýdiń aldynda elordalyq ujym daıyndyǵyn pysyqtaýda. Qazaqstannyń tórt dúrkin chempıony Dýbaıda oqý-jattyǵý jıyny aıasynda Reseı chempıony, máskeýlik «Spartak» komandasyna qarsy oınap, 3:2 esebimen jeńiske jetti.
Biz osy oraıda, elimizdegi fýtbol mamandary arasynda kishigirim saýalnama júrgizip, elordalyq komandanyń «Sportıngke» qarsy oıyndaǵy múmkindigi jáne «Spartakqa» qarsy kezdesýdiń nátıjesi týraly pikirlerin suraǵan bolatynbyz.
1. «Astana» Dýbaıdaǵy OJJ aıasynda Reseı chempıony máskeýlik «Spartak» komandasyna qarsy oıynda jeńiske jetti. Bul oıyn nátıjesi kezdeısoq pa, álde, komandalardyń shynaıy deńgeıin kórsetti me?
2. Stanımır Stoılov komandaǵa tıisti deńgeıde kóńil bólinbeı jatqandyǵyn, tipti, sońǵy ýaqytta transferge qarajattyń joqtyǵyn, al syıaqylardyń tólenbegenine bir jyldan astam ýaqyt ótkendigin aıtyp júr. Sizdiń oıyńyzsha «Astana» dál qazirgi qarjylyq múmkindikterimen Eýropanyń úzdik komandalarymen básekelese ala ma?
3. «Astana» komandasy eki maýsymda Reseı, Polsha, Slovenııa jáne Chehııanyń úzdik klýbtary – «Spartak» (Máskeý), «Legııa» (Varshava), «Marıbor», «Slavııa» (Praga) komandalaryna qarsy ótkizgen oıyndarda basym tústi. «Astananyń» jetken jetistikteriniń artynda kim nemese ne tur dep oılaısyz?
4. «Astana» komandasy 15 aqpan kúni Eýropa Lıgasynyń 1/16 kezeńi aıasynda portýgalııalyq «Sportıngke» qarsy alǵashqy kezdesýin ótkizedi. Otandyq klýbtyń osy kezdesýlerde jeńiske jetý múmkindigi qanshalyqty dep oılaısyz?
Quralbek ORDABAEV, «Qaırat» fýtbol klýbynyń ardager qaqpashysy:
1. Dál qazir eki komanda birdeı jaǵdaıda, birdeı deńgeıde. Reseı chempıonaty naýryz aıynyń basynda jalǵasyn tapsa, bizdegi el chempıonaty da sol ýaqytta bastalady. Al oǵan deıin eki komandanyń Eýropa Lıgasy aıasyndaǵy matchtary bar. Al keshegi oıynǵa keler bolsaq, «Astana» jeńiske degen jiger tanytty. Oıynnyń oqý-jattyǵý jıyny aıasynda ótkendigine qaramastan bul elordalyq oıynshylardyń ózderine degen senimdilikterin arttyratyny anyq. Eki komandanyń tolyq bet-beınesin kóre aldyq dep oılaımyn.
2. Stanımır Stoılov bapkerdiń syıaqy týraly aıtqanyna pikir bildirýden aýlaqpyn. Sebebi, bul jaǵdaıǵa klýb basshylyǵy men bas demeýshisi «Samuryq Qazyna» qorynyń ókilderi jaýap berýi kerek. Osyǵan deıin, «Astana» fýtbol klýbynyń prezıdenti Saıan Hamıtjanov maýsymǵa jáne Eýropa Lıgasynyń 1/16 kezeńi aıasynda ótetin «Sportıngke» qarsy kezdesýge daıyndyq josparǵa saı ótip jatyr dep málimdeme jasady. Al klýbtyń múmkindikterine keler bolsaq, «Astana» komandasy sońǵy jyldary óte joǵary nátıjelerge jetti. Ony Eýropanyń úzdik klýbtaryna qarsy kezdesýlerde kórsetken oıyndarymen dáleldeı aldy.
3. Dál qazir Eýropada bizdiń eldegi fýtboldyń deńgeıine mensinbeýshilikpen qaraý degen joq. Sebebi, «Astana» komandasy sońǵy jyldardaǵy jetistikteri arqyly ol túsinikti túgeldeı joıdy. Dál qazir «Astana» jáne «Qaırat» Qazaqstannyń betke ustar komandalary.
4. Eki oıyn qorytyndysyn naqty aıta almaımyn. Al «Astana Arena» stadıonynda ótetin kezdesýde jeńiske jetetinimizge senimdimin. Osyǵan deıin eshbir qazaqstandyq klýb mundaı nátıjege jetken emes. Elordalyq komanda oıynshylary matchty Eýropanyń beldi fýtbol agentteri tamashalaıtynyn jaqsy biledi. Sondyqtan, ózderin kórsetýge, jeńiske jetýge erekshe tyrysady.
Asqar QOJABERGENOV, bapker:
1. «Astana» komandasy zańdy túrde jeńiske jetti. Degenmen, eki komandanyń oqý-jattyǵý jıyndaryn bastaǵandaryna az ǵana ýaqyt boldy. Olar ózderiniń áli de tolyqtaı baptaryna kele qoıǵan joq. Al BAQ-ta jarııalanǵan málimetter boıynsha reseılik komanda Qazaqstan chempıonyna qarsy oınaýǵa ózderi usynys jasaǵan. Osynyń ózi bizdiń eldegi fýtboldyń jańa deńgeıge kóterilgenin kórsetedi.
2. «Astana» bapkeri Stanımır Stoılovtyń pikirimen kelispeske amal joq. Sebebi, ol oıynshylardyń kózqarasyn ashyq bildire alatyn, soǵan jaýap beretin maman. Al joǵaryda aıtylǵan máseleler komandany oıynǵa daıyndaýda keri áserin tıgizetini anyq. «Astana» komandasynyń búgingi kúnge deıin jetken jetistigine kóz salatyn bolsaq, onda komandaǵa syıaqylary tólenýi tıis.
3. Men dál qazir «Astana» – Eýropanyń myqty komandalarynyń biri dep senimmen aıta alamyn. Komanda osy jetken jetistikterin aldaǵy maýsymda qaıtalap, elimizdiń namysyn eýrokýbokterde laıyqty qorǵasyn desek, «Astanaǵa» barlyq jaǵynan qoldaý aýadaı qajet.
4. Alla sátin salsa, sol oıyndy kórýge men de arnaıy Astanaǵa baramyn. Meniń oıymsha portýgalııalyq komandany óz alańymyzda birneshe dop aıyrmasymen jeńýge múmkindigimiz bar. Sebebi, ýaqyt aıyrmashylyǵy, Qazaqstanǵa deıingi araqashyqtyq, «Astana Arenadaǵy» jasandy alań jáne jankúıerlerdiń qyzý qoldaýy jeńiske kepildik beredi. Astanada ótetin kezdesýde jaqsy nátıjege qol jetkizsek, komanda syrt alańda qalaı oınaý kerek ekendigin biledi. Oǵan elordalyq komandanyń ótken maýsymdaǵy latvııalyq «Iýrmala», ızraıldik «Makkabı», chehııalyq «Slavııaǵa» qarsy kezdesýlerde kórsetken oıyny dálel.
Aıdar KÚMISBEKOV, Ulttyq quramanyń eks-qorǵaýshysy:
1. Árıne, ádil nátıje «Astana» komandasy ótken jyly oqý-jattyǵý jıyny barysynda reseılik klýbqa 0:5 esebimen ese jibergen bolatyn. Al búgingi jeńis komandanyń jańa deńgeıge kóterilgenin kórsetti. Oıynnyń joldastyq match bolǵandyǵyna qaramastan, astanalyqtar osy oıynda jeńiske jetý arqyly qazaqstandyq jankúıerlerge erekshe qýanysh syılady.
2. Álbette, básekelese alady. «Astana» fýtbol klýbynyń Eýropa Lıgasynyń 1/16 kezeńine shyǵýy sonyń aıqyn dáleli. Bapker aıtyp otyrǵan komandadaǵy qarjylyq múmkindikti jaqsartý, oıynshylarǵa syıaqylaryn tóleý, qatarǵa jańa oıynshylar alý kerek degen pikirlerimen tolyqtaı qosylamyn. Sebebi, komandanyń oıynyna joǵarydaǵy faktorlar tikeleı áser etedi. Eýropadaǵy myqty komandalarǵa qarsy oıyndarda jeńiske jetý úshin, komanda quramyna eýrokýbokterde jınaǵan tájirıbesi mol 1-2 oıynshy alsa dep oılaımyn.
3. «Spartakqa» qarsy oıyndy mysalǵa alar bolsaq, astanalyqtar burynǵymen salystyrǵanda qarsylastarynan qaımyǵý, qorqý degendi umytqan. О́zderine degen senimdilikteri basym. Osy oraıda, «Astana» fýtbol klýbyn Eýropanyń orta deńgeıdegi ujymdarynyń biri dep senimmen aıtýǵa bolady. Tipti, qazir jankúıerlerdiń ózi elordalyq komandadan tek jeńis kútedi. Onyń barlyǵy durys tańdalǵan oıynshylar men bapkerler quramynyń, klýb basshylyǵynyń, jalpy alǵanda durys baǵytta jumys istep jatqan júıeniń arqasy. Komanda osy 2-3 jyldyń ishinde jańa deńgeıge kóterildi.
4. Kez kelgen Qazaqstan azamaty «Astananyń» odan ári ótkenin qalaıdy. Meniń oıymsha eki komandanyń múmkindigi birdeı, 50 de 50. Eger elordalyq komanda oıynǵa tyńǵylyqty daıyndalyp, durys taktıka tańdaı bilse, kelesi kezeńge joldama alatyn múmkindigi bar.
Ermuhamed MÁÝLEN,
«Egemen Qazaqstan»