Qyr astynda qulaǵy qyltıyp qysqy Olımpıada tur. Aqpan aıynyń 9-y kúni Ońtústik Koreıanyń Phenchhan qalasynda XXIII qysqy Olımpııa oıyndarynyń alaýy tutanyp, tórtkúl dúnıeniń tarlan sportshylary álem nazaryn ózderine aýdarmaq.
Qazirgi tańda Qazaqstannyń olımpııalyq qurama komandasynyń sapynda Qaraǵandy oblysynyń tórt sportshysy bar. Olar – konkımen júgirýshiler Ekaterına Aıdova, Stanıslav Palkın jáne Artem Krıkýnov, sondaı-aq shańǵyshy Sergeı Malyshev.
Tórtjyldyqtyń basty jarysyna daıyndyq baıaǵyda bastalyp ketkenimen, bizdiń sporttyq federasııalar Ońtústik Koreıada el namysyn qorǵaıtyn sportshylardyń esimderin endi ataı bastady. Mysaly, konkımen júgirý sporty boıynsha Ulttyq quramanyń jattyqtyrýshylar shtaby olımpııalyq kvotany bylaısha bóliske saldy. Quramada bir ǵana sportshy qyz bolady. Ol – qaraǵandylyq jelaıaq konkıshi Ekaterına Aıdova. Halyqaralyq dárejedegi sport sheberi, jasóspirimder arasyndaǵy Álem kýbogynyń eki dúrkin jeńimpazy, Azııa chempıony úsh birdeı qashyqtyqta – 500, 1000 jáne 1500 metr aralyǵynda baq synaıdy. Aıta ketý kerek, Aıdova úshin bul úshinshi synaq: budan buryn ol Vankýver jáne Sochı olımpıadalarynda óner kórsetip, ókinishke qaraı júldesiz qaıtqan bolatyn.
Erler arasynda Olımpıada lısenzııasyn qurama komandanyń eń jas konkıshileri – qaraǵandylyqtar Artem Krıkýnov pen Stanıslav Palkın jeńip alǵan. Aldyńǵysy 500 metrde synǵa tússe, sońǵysy 1000 jáne 1500 metr qashyqtyqtarda júldege talasatyn bolady. Bul ekeýi de halyqaralyq dárejedegi sport sheberi, Ýnıversıada men Azııa oıyndary dodasyna qatysqan tájirıbeli sportshylar. Bir ókinishtisi, bapkerler Stanıslav Palkındi ázirge qosymsha quramda ustap otyr.
Sonymen qatar Olımpıada dodasyna taǵy bir qaraǵandylyq sportshy – shańǵydan halyqaralyq dárejedegi sport sheberi Sergeı Malyshev túspek. Jastyǵyna qaramastan Malyshev ájeptáýir tájirıbe jınaqtaǵan sportshy. Ol – jasóspirimder arasyndaǵy bes, jastar arasyndaǵy eki jáne eresekter arasyndaǵy bir álem chempıonatyna qatysqan. Ámbebap shańǵyshy estafeta, sprınt, jappaı start jáne komandalyq jarys sııaqty birneshe syn boıynsha óner kórsetedi.
Taıaý arada qaraǵandylyq taǵy bir shańǵyshy, halyqaralyq dárejedegi sport sheberi Anna Stoıannyń Olımpıadaǵa qatysý máselesi sheshilýge tıis. Jas sportshy úsh birdeı qysqy Ýnıversıadaǵa qatysqan, jasóspirimder arasyndaǵy tórt, jastar arasyndaǵy úsh álem chempıonatynda óner kórsetken. Eger de Stoıan aldaǵy synaqtan sátti óter bolsa, onda bes birdeı qaraǵandylyq qysqy Olımpıadada el namysyn qorǵaıtyn bolady.
Qaırat ÁBILDA, «Egemen Qazaqstan»