Oral qalasynyń irgesindegi Derkól kentinde 600 oryndyq jańa mektep paıdalanýǵa berildi. 1 434,1 mln. teńge memleket qarjysyna kóterilgen mektep ǵımaraty «Nurly jol» baǵdarlamasy aıasynda salynǵan. «Altaır» qurylys kompanııasy qurylys jumystaryn 2017 jyldyń naýryz aıynda bastaǵan edi. Mine, bir jyl ishinde 6 korpýstan turatyn sáýletti ǵımarat daıyn boldy.
600 oqýshyǵa arnalǵan mektepte barlyǵy - 56 oqý kabıneti bar. Onyń 4-ýi mýltımedııalyq, 4-ýi ınformatıka kabınetteri bolsa, fızıka, bıologııa, hımııa pəni kabınetteri arnaıy zerthanalarmen jabdyqtalǵan. 25 oqýshyǵa arnalǵan oqý zalymen qamtylǵan kitaphana, 200 oryndyq akt zaly men qos sport zal, 130 oryndyq ashana oqýshylardyń alańsyz oqýyna, bilim alýyna tolyq múmkindik beredi. Sondaı-aq oqýshylardy jan-jaqty tárbıeleý maqsatynda arnaıy 2 oqý sheberhanasy da jasaqtalǵan. Jeti kabınet ınteraktıvti taqtamen jabdyqtalsa, mektep radıosy úshin de bólme arnalǵan. Odan bólek psıholog, logoped jáne medqyzmetkerge de arnaıy kabınetter qarastyrylǵan. Mektepte ónerli balalarǵa arnalǵan «Shabyt» ortalyǵy da jumys jasamaq.
Jınalǵan qaýymdy aıtýly sharamen quttyqtaǵan Batys Qazaqstan oblysynyń əkimi Altaı Kólginov Elbasynyń bıylǵy Joldaýynda bilim berý salasyna erekshe kóńil bólingendigine toqtaldy.
- Osyndaı mektep ǵımaratynyń salynýy - eń aldymen memlekettiń zor qoldaýynyń nətıjesi. «Nurly jol» baǵdarlamasy boıynsha oblysta mektep qurylysy úshin 3,5 mlrd teńge bólinip, barlyǵy 2400 balaǵa arnalǵan 4 mektep qurylysy qolǵa alynǵan edi. Sonyń birin búgin saltanatty jaǵdaıda ashyp otyrmyz. Bıyl Elbasy óziniń halyqqa Joldaýynda bilim berý salasyna erekshe toqtaldy. Sonyń ishinde jańartylǵan baǵdarlama boıynsha oqýdan ótken muǵalimderdiń jalaqysyn 30-50%-ǵa ósirý týraly aıtty. Biz de óz tarapymyzdan muǵalimderdiń biliktiligin arttyrý məselesine mən beremiz. Sondaı-aq mektepterdiń tehnıkalyq qamsyzdandyrylýy da udaıy nazarda. Oblys boıynsha aýyldarda 223 shaǵyn jınaqtalǵan mektep bar. Bıyl olardy sapaly elektrondy kontentpen qamtıtyn bolamyz. Bul óz kezeginde qala men aýyl mektebiniń arasyndaǵy aıyrmashylyqty azaıtýǵa septigin tıgizedi. Bilimdi urpaq – eldiń bolashaǵy. Táýelsizdigimizdi nyǵaıtyp, alǵa jeteleıtin búgingi oqýshylar. Sondyqtan memleket olardyń sapaly bilim alýyna barlyq múmkindikti jasap otyr, - dedi Altaı Seıdiruly.
Jańa mektep 500 balany qabyldap otyr, munda 25 synyp ashylady. Sondaı-aq mektep janynan 100 balaǵa shaǵyn ortalyq jumys jasaıtyn bolady.
Aıta ketý kerek, bıyl Aqjaıyq, Bórli, Qaztalov aýdandarynda da jańa bilim oshaǵynyń qurylysy júrýde. Jyl saıyn mektep oqýshylarynyń sany da artyp keledi. Máselen, qazirgi tańda oblys boıynsha oqýshylardyń sany 48 myńnan assa, onyń 2900-y tek sońǵy bir ǵana oqý jylynda qosylǵan.
Qazbek QUTTYMURATULY
«Egemen Qazaqstan»
Sýretterdi túsirgen Temirbolat TOQMÁMBETOV