Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýynda fıskaldy ortalyqsyzdandyrý aıasynda shaǵyn jáne orta bıznesten túsetin korporatıvti tabys salyǵyn óńirlik bıýdjetterge berý máselesin sheshý tapsyryldy.
Osyǵan oraı, búgin Mańǵystaý oblysynda memlekettik kirister departamentiniń 2017 jylǵy qyzmetiniń qorytyndysy men 2018 jylǵa salyq salý bazasyn keńeıtý boıynsha mindetteri týraly, QR Salyq jáne Keden kodeksteriniń negizgi ózgeristerin túsindirý boıynsha semınar jınalys ótti.
2018 jyldyń 1 qańtaryndaǵy jaǵdaı boıynsha oblysta barlyǵy 632 914 salyq tóleýshi tirkeldi. 2017 jyly ishki saýda aınalymy, ımporttyq-eksporttyq operasııalardy qosa alǵanda, 4 711 mln. AQSh doll. qurady.
-2017 jyldyń qorytyndysy boıynsha QR QM MKK quzyryndaǵy shoǵyrlandyrylǵan bıýdjettiń jetkizilgen jyldyq jospary 147,0%-ǵa oryndalyp, bekitilgen jospar 486,6 mlrd.teńge bolsa, naqty 715,3 mlrd.teńge tústi. Jergilikti bıýdjet – 97,3 % (jospar 127,9 mlrd.teńge bolsa, naqty 124,4 mlrd.teńge tústi) oryndaldy. Mańǵystaý oblysy boıynsha jalpy boryshkerler ishinde eń iri jáne qıyndyq týdyryp otyrǵan 2 boryshker bar, olardyń negizgi bereshek somasy 9,7 mlrd. teńge kóleminde bolyp, oblys boıynsha jalpy beresi somasynyń 67,8% quraıdy.
- «Kazpolmýnaı» JShS negizgi beresi 6,1 mlrd. teńge;
- «Tolkynneftegaz» JShS negizgi beresi 3,6 mlrd. teńge.
Búgingi tańda atalǵan boryshkerlerge qatysty Salyq kodeksinde kózdelgen barlyq májbúrlep óndirý sharalary tolyqtaı qoldanylǵan. Sonymen qatar, bul boryshkerler máselesi qazirgi kezde 2010 jyldan beri Arbıtrajdyq sotta (Stokgolm,Shvesııa) jáne de Anglııa joǵary sotynda (London) qaralýda» dedi óz baıandamasynda Mańǵystaý oblysy boıynsha Memlekettik kirister departamentiniń basshysy Álibek Tilegenov.
- Aýdandar men qalalar ákimderi salyq tóleýshilerdiń jaýapkershiligin arttyrý úshin oblystyń salyq salý bazasyn keńeıtýge, jergilikti bıýdjetterdiń kiris bóligin ulǵaıtýǵa barlyq qajetti sharalardy qoldana otyryp, kúsh salý kerek. Memlekettik satyp alý basqarmasyna tender ótkizý kezinde áleýetti merdigerlerge tehnıkalyq talaptarǵa jáne salyq aýyrtpalyǵy men jumys oryndaryn qurý sharttaryna sáıkes qoıylatyn talaptardy engizý týraly máseleni qarastyrýdy tapsyramyn. Memleket basshysy shaǵyn jáne orta bıznesti damytýdyń mańyzdylyǵyn únemi atap ótedi. Sońǵy jyldary memleket tarapynan kórsetiletin qoldaý sharalaryn keńeıtýdiń arqasynda kásipkerlik belsendilik jetkilikti deńgeıde ósti, degen Mańǵystaý oblysynyń ákimi E.Toǵjanov bıýdjet túsimderiniń búgingi jaǵdaıy, osy baǵytta alǵa qoıylǵan sharalar, 1 qańtardan bastap kúshine engen Salyq kodeksiniń jańashyldyqtary týraly aıtyp, salyqtyq bazany kúsheıtý máseleleri boıynsha naqty tapsyrmalar berdi.
2017 jyly shaǵyn jáne orta bıznestiń sýbektilerine 1,4 mlrd. teńge kóleminde paıyzdyq mólsherlemeni sýbsıdııalaýǵa qarjy bólindi. 2017 jyly «Bıznestiń jol kartasy-2020» baǵdarlamasy aıasynda 200-den astam kásipker osy qarajatqa ıe boldy. Bul 4 036 jumys ornyn saqtaýǵa jáne qosymsha 1,5 myń jańa jumys ornyn ashýǵa múmkindik berdi.
Jıyn sońynda 2017 jyldyń qorytyndysy boıynsha «Úzdik salyq tóleýshi» men «Úzdik syrtqy ekonomıkalyq qyzmetke qatysýshy» úzdikter marapattaldy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy