Altaı men Alataýdyń arasyn kezip, saq-saq kúlgen sary aıaz bir jaǵynan talaı jandy áýrege salyp, qyspaqqa alǵanymen, ekinshi jaǵynan adamdardyń júregine meıirimdilik, qaıyrymdylyq sezimderin uıalatqandaı.
Keshe ǵana buqaralyq aqparat quraldarynan aıaldamada turyp shyńyltyr aıazdyń shyrmaýyna túsken elorda turǵyndaryna ystyq shaı taratylǵanyn oqyp edik. Mundaı izgi ister bizdiń óńirde de bastaý aldy. 23 qańtar kúni О́skemendegi Halıfa Altaı meshiti, О́skemen ortalyq meshiti, Muhamadı jáne Zashıta meshitteri bastaǵan qaladaǵy barlyq meshitterden 20-dan astam taksı shyǵyp, aıaldamada avtobýs kútip aıaz qaryǵan turǵyndardy qalaǵan jerlerine deıin jetkizip saldy. «Imamdarymyz kúndiz jáne keshki mezgilderde kisi kóp jınalatyn jerlerge arnaıy bardy. Igi iske atsalysýǵa meshit jamaǵattarymen qatar, kóligi bar qala turǵyndary da qosylyp jatyr. Búgin amandyq bolsa 53 oryndyq úlken avtobýs shyǵarýdy josparlap otyrmyz. Bul avtobýs «О́zen vokzaly» aıaldamasynan Ahmer aýylyna deıingi baǵytta júretin bolady. Sonymen qatar qalalyq ishki saıasat bólimimen birlesip aıaldamalarǵa baryp, adamdarǵa ystyq shaı tarattyq», deıdi О́skemendegi Halıfa Altaı meshitiniń naıb-ımamy Dáýlet Qabıboldın.
О́skemen qalalyq ishki saıasat bóliminiń qyzmetkeri Álibek Tursymbetov «ımam-taksı» jobasy 23 qańtar kúni túski saǵat 1-den bastap uıymdastyrylyp, «О́zen vokzaly» – Ahmer aýyly, oblystyq meshit – JMK (Jibek matalar shaǵyn aýdany), ortalyq bazar – Ablaket shaǵyn aýdany sekildi úsh baǵytta júrgenin aıtady. «Taksıler kóshede qol kótergen kisilerdi de otyrǵyzyp alyp, qalaǵan jerlerine jetkizdi. Keshki saǵat bes jarymnan bastap О́skemendegi jastar resýrstyq ortalyǵynyń eriktileri oblystyq meshittiń ımamdarymen birge qaladaǵy eń úlken aıaldamalarda ystyq shaı taratty. Bul aksııa aıazdyń beti qaıtqansha jalǵasatyn bolady», deıdi ol.
Reti kelgende aıta keteıik, «ımam-taksı» jobasyn oblystyq meshit qyzmetkerleri buǵan deıin Ramazan aıynda uıymdastyrǵan bolatyn.
Azamat QASYM, «Egemen Qazaqstan»
О́SKEMEN