12-13 qańtar aralyǵynda aýdandyq dene shynyqtyrý jáne sport bóliminiń uıymdastyrýymen Shákárim Qudaıberdiulynyń 160 jyldyǵyna jáne Abaı aýdanynyń qurylǵanyna 90 jyl tolýyna oraı aýdan ákiminiń júldesi úshin dopty hokkeıden eresekter arasynda jarys ótti.
Saıystyń ashylý saltanatyna qatysqan aýdan ákimi Jarqynbek Baısabyrov búginde aýdanda dopty hokkeı sportyn damytýǵa kóńil bólinip jatqanyn atap ótip, sportshylarǵa sáttilik tiledi.
Osylaısha muz ústindegi jarys qyzyp sala bergen. Dodaǵa qatysýshylar ózara úsh topqa bólinip, sheberlik baıqasty. 13 komanda qatysqan básekede Elektr júıesi mekemesi, О́rt sóndirý mekemesi, О́ner mektebi, jastar komandasy jáne barlyq aýyldyq okrýgter óner kórsetti. Eki kúnge sozylǵan jarys óte tartysty ótti. Komandalaryn qoldaýǵa kelgen jankúıerler de mol boldy. Saıys nátıjesinde úzdik oıyn órnegin kórsetken komandalar júldeli oryndardy ıelendi. I oryndy Qaraýyl aýylynyń komandasy ıelense, II oryndy Keńgirbaı bı aýylynyń jigitter enshiledi. Al júldeli III oryndy Elektr júıesi mekemesine buıyrdy.
Sonymen qatar oıyn barysynda erekshe ónerimen kózge túsken sportshylar da arnaıy taǵaıyndalǵan marapattarǵa ıe boldy. Syrym Mamajaev «Úzdik qaqpashy» (Qaraýyl aýyly), Baýyrjan Asqarov «Úzdik oıynshy» ataǵyn (Elektr júıesi mekemesi) ıelense, Qutanbek Ádil «Úzdik qorǵaýshy» (Qaraýyl aýyly), Serik Ádilhanov «Úzdik shabýylshy» (Keńgirbaı bı aýyly) dep tanyldy. Jarys jeńimpazdary aýdandyq dene shynyqtyrý jáne sport bóliminiń madaqtama gramotalarmen jáne medaldarymen marapattaldy.
Azamat QASYM,
«Egemen Qazaqstan»
Shyǵys Qazaqstan oblysy,
Abaı aýdany