2011 jylǵy 10 qazan, Astana, Úkimet úıi
«Jer ýchaskeleri jeke menshikke berilgen kezde, memleket nemese memlekettik jer paıdalanýshylar jalǵa bergen kezde olar úshin tólemaqynyń bazalyq stavkalaryn, sondaı-aq jer ýchaskelerin jaldaý quqyǵyn satý tólemaqysynyń mólsherin bekitý týraly» Qazaqstan Respýblıkasy Úkimetiniń 2003 jylǵy 2 qyrkúıektegi № 890 qaýlysyna ózgerister men tolyqtyrýlar engizý týraly
Qazaqstan Respýblıkasynyń 2003 jylǵy 20 maýsymdaǵy Jer kodeksiniń 10-babynyń 1-tarmaǵyna sáıkes Qazaqstan Respýblıkasynyń Úkimeti qaýly etedi:
1. «Jer ýchaskeleri jeke menshikke berilgen kezde, memleket nemese memlekettik jer paıdalanýshylar jalǵa bergen kezde olar úshin tólemaqynyń bazalyq stavkalaryn, sondaı-aq jer ýchaskelerin jaldaý quqyǵyn satý tólemaqysynyń mólsherin bekitý týraly» Qazaqstan Respýblıkasy Úkimetiniń 2003 jylǵy 2 qyrkúıektegi № 890 qaýlysyna mynadaı ózgerister men tolyqtyrýlar engizilsin:
taqyryby mynadaı redaksııada jazylsyn:
«Jer ýchaskelerine tólemaqynyń bazalyq stavkalaryn bekitý týraly»;
1-tarmaqta:
1) tarmaqsha mynadaı redaksııada jazylsyn:
«1) 2-qosymshaǵa sáıkes aýyl sharýashylyǵy maqsatyndaǵy jer ýchaskeleri jeke menshikke berilgen kezde olar úshin tólemaqynyń bazalyq stavkalary;»;
mynadaı mazmundaǵy 1-1) tarmaqshamen tolyqtyrylsyn:
«1-1) memleket menshigindegi jáne jer paıdalanýǵa berilmegen jer ýchaskelerine jeke servıtýt belgileý úshin jer salyǵy mólsheriniń elý paıyzy mólsherinde tólemaqy;»;
3-tarmaq mynadaı redaksııada jazylsyn:
«3. Jer resýrstaryn basqarý jónindegi ortalyq ýákiletti organ ınflıasııanyń jalpy deńgeıi týraly memlekettik statıstıka derekteriniń jáne jer naryǵynyń monıtorıngi nátıjeleriniń negizinde qajettiligine qaraı Qazaqstan Respýblıkasynyń Úkimetine aýyl sharýashylyǵy maqsatyndaǵy jer ýchaskelerin jeke menshikke bergen kezde olar úshin tólemaqynyń bazalyq stavkalarynyń ózgerýi týraly usynystar engizsin.»;
mynadaı mazmundaǵy 3-1-tarmaqpen tolyqtyrylsyn:
«3-1. Oblystardyń, respýblıkalyq mańyzy bar qalalardyń, astananyń jergilikti memlekettik organdary jergilikti talaptarǵa jáne erekshelikterge oraı aýyl sharýashylyǵy maqsatyndaǵy jerlerdi qospaǵanda, oblys ortalyqtarynda, respýblıkalyq mańyzy bar qalalarda, astanada, oblystyq jáne aýdandyq mańyzy bar qalalarda, kentterde jáne aýyldyq eldi mekenderde jeke menshikke berý kezinde jer ýchaskeleriniń bazalyq stavkalaryn bekitsin.»;
kórsetilgen qaýlynyń 1-qosymshasy alyp tastalsyn.
2. Osy qaýly alǵashqy resmı jarııalanǵanynan keıin kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri K. MÁSIMOV.