Almatyǵa arman arqalap kelgen aýyl balasy bıik maqsattardy murat tutty. Tirshiliktiń myń san boıaýlaryn ishki daýysymen úndestirip bul ónerden ózine ǵana tán ádemi ıirim tabýǵa talpyndy. Ár týyndysynan tarıhymyzdyń, ulttyq bolmysymyzdyń ısi burqyraıdy. Onyń kenebindegi keıipkerler máńgilik qozǵalysta.
Sýret ónerine qyzyǵýshylyǵy erte jastan oıanǵan Almas Nurǵojaev osy ýaqytqa deıin talaı belesterdi baǵyndyryp, aldyńǵy tolqyn aǵalarynyń alǵysyna bólenip júrgen qylqalam ıesi. Almas shyǵarmalarynda kóshpeli halqymyzdyń turmys tirshiligi, salt-dástúri, ádep-ǵurpy keńinen kórinis tabady. Tuıaǵymen or qazyp, aýyzdyǵymen alysqan tulpar da, jaýyna jebedeı atylǵan has batyr da, samalmen jarysyp ińkárine jan sózin aıtýǵa asyqqan bozbala da, tirshiliktiń tynymsyz qozǵalystar men úzdiksiz kúresterden turatynyna úńildiredi, fılosofııalyq tereńdikke tartady. Almas shyǵarmalarynyń rýhynan halqymyzǵa tán minez baıqalady.
Onyń «Túngi sholý» atty týyndysy jaıly ónertanýshy Batıza Ádı: «Bul avtordyń ishki jan dúnıesimen astasqan kórkem týyndy. Qarańǵylyq basqan túngi sát, ıaǵnı el tynyshtyǵyn oılaǵan bir top sarbazdyń alaý jaǵyp keńes qurǵan sátin beıneleıdi. Kompozısııanyń orta bóliginde er adamnyń kishkentaı balany qaýsyra qushaqtap tolǵanysta otyrǵan sáti taqyryp aıasyn barynsha keńeıte túskendeı. El taǵdyry men urpaq bolashaǵyn oılaǵan, beıbitshilik pen tynyshtyqty ańsaǵan el aǵalarynyń úmiti, keıingi urpaqqa amanat ekenin oqıǵa mazmunymen asha túsedi. Oqıǵanyń aıtar taǵylymy osynda jatyr. Tarıhı janrǵa qalam terbegen Almastyń shyǵarmashylyǵy qazaq beıneleý ónerine qosylǵan úlken úles» dep baǵalaıdy.
Shyǵarmashylyq ıesimen az-kem áńgimeleskenimizde, sýretterinen ǵana emes, óziniń óne boıynan da ónerge degen tazalyqtyń tunbasy kórinip turdy.
– Ákem de kásibı sýret mamany. Osy ónerge bala jasymnan baýlydy. Kishkene kúnimde jazyp-syzǵan shımaılarym, ermeksazdan jasaǵan túrli dúnıelerim jáı ánsheıin ermek emes, ómirlik qalaýymnyń, shyǵarmashylyq tynysymnyń alǵashqy álippesi eken. Qanapııa Temirbolatuly, Jumaqyn Qaıranbaev aǵalarymyzdyń ulttyq taqyryptaǵy dúnıeleri armanyma qanat bitirdi. Sýretshige ǵana emes, jalpy kez kelgen óner adamyna eń kerek qasıet – izdenis. Kompozısııalyq qurylym, oı, tús tańdaý, erekshelik turǵysynan únemi izdenis ústinde júremin. Shyǵarmashylyǵymnyń negizgi ózegi – tabıǵı bolmysymyzǵa tán ulttyq taqyryptar. Aldaǵy ýaqytta, ustazdarymyzdyń baǵyt-baǵdary boıynsha osy dúnıelerdi zamanaýı turpatta damytsam degen oıym bar, – deıdi Qazaqstan sýretshiler odaǵynyń múshesi Almas Nurǵojaev.
Ýaqyttyń tynysyn, dalanyń rýhy men babanyń ǵurpyn izdeseńiz Almas salǵan sýretterge úńilip kórińiz. Týǵan jerdiń tabıǵatyna sýretshiniń kózimen qarasańyz, ózińiz baıqamaǵan talaı tańǵajaıypqa tánti bolasyz. Qazirgi tańda Almatydaǵy Oral Tańsyqbaev atyndaǵy Sándik qoldanbaly óner kolledjiniń «Keskindeme, músin, sándik dekorasııa bóliminde» sabaq beretin ol otyz jasynda úlken ónerge olja saldy. Onyń kenebindegi máńgilik qozǵalys máńgilik eldiń muratyn asqaqtatyp turǵandaı.
Arman OKTIаBR,
«Egemen Qazaqstan»
ALMATY