Semeıdegi qurylys kolledjiniń №1 jataqhanasynda órt oqıǵasy oryn aldy.
Parkovaıa kóshesi,1 meken-jaıynda ornalasqan jataqhananyń 4-qabatynda elektrshıtiniń elektr jelileri men avtomatty elektr eseptegishteri janǵan eken. Semeı qalalyq TJB baspasóz qyzmetinen habarlaǵandaı, qaladaǵy qutqarý №2 toby ýaqıǵa bolǵan jerge jetken.
О́rt sóndirilgennen keıin, jataqhana kezekshisiniń aıtýynsha, qurylys kolledjiniń 4-kýrs stýdenti Jasulan Berekeev qutqarý toby, órt sóndirýshiler kelgenshe óz betimen tórt balany aman-esen alyp shyǵypty. Jasulan aldymen besinshi qabattaǵy kishkentaı balanyń daýysyn estigen. Dereý oılanbastan alǵa umtylǵan. Tútin basqan dáliz túbinen kishkentaı sábıdiń jylaǵan daýysyn estigen ol qutqarýshylar kelgenge deıin betin kúrtesimen jaýyp, balany qutqarý úshin tútinge kirip ketedi. Sóıtip, balany alyp shyǵyp, úshinshi qabattaǵy eresekterge tabystap, besinshi qabatqa qaıta umtylǵan. Barlyq bólmelerdi aralap júrip, №36 bólmede taǵy eki balanyń qalyp qalǵanyn baıqaǵan. Balalardy kúrtesimen qymtaı jaýyp, alyp shyqqan soń, olardy da úshinshi qabatta turǵandarǵa tabystaıdy.
- Kishkentaı balalardy oılaǵan kezde qorqynyshtyń ne ekendigin múlde umytyp kettim, - deıdi Jasulan Talantuly, - tez arada qımyldamasam, balalardan aırylyp qalatyndyǵymyzdy uqtym. Qaýip pen qater maǵan tez sheshim shyǵaryp, qımyldaýyma ǵana múmkindik baryn uqtyrdy.
Jasulannyń arqasynda jeti jasar eki qyz bala men 4 jastaǵy ul bala aman-esen qaldy. Kolledj ujymy men Semeı qalalyq TJ Basqarmasy stýdenttiń beıbit kúndegi erligin baǵalap, ony marapattaýdy josparlap otyr.
Raýshan NUǴMANBEKOVA
Semeı