Oqyrman oıy
Zeınettegi mektep dırektory nege kóp?
Synyp joǵarylaǵan saıyn oqý baǵdarlamalary da kúrdelilene túsetini anyq. Al orta mektepten keıingi oqýdy tek daryndylary ǵana jalǵastyratyn ýaqyt kele me dep oılaımyn. Bolashaqty oılasaq ony basqaratyn adamdardy da durys tańdaýǵa basa mán berýimiz kerek.
Bul kúnde Almaty oblysynda ǵana emes, Jambyl, Ońtústik Qazaqstan oblystarynda da orta mektepterdi áldeqashan zeınetkerlikke shyqqan, jetpistiń ar jaq, ber jaǵyndaǵy adamdar basqaryp otyr. Olardyń ishinde naǵyz janashyr pedagogtary da bar shyǵar?.. Biraq adamnyń qabileti de shekteýli emes pe? О́ıtkeni sırek bolsa da, zeınetkerlikke shyqqan keıbir muǵalimderdiń júıkesi syr bere bastaıtynyna kýá bolyp júrmiz. О́z basym, zeınetke shyqqannan keıin er adamdar úsh jyl mektep dırektory bolyp, 66 jasqa deıin qyzmet istesin. Odan arǵysy artyqtaý dep oılaımyn.
О́ıtkeni bul kúnde jemqorlyq jóninen bilim salasy da jıi synalýda. Osyndaı oı aıtylǵan saıyn jetpistiń ar jaq, ber jaǵyndaǵy mektep dırektorlaryn kórgen kezde aýdandyq oqý bóliminiń nemese oblystyq bilim basqarmasynyń basshylary «bir nárse alý úshin ustap júr-aý osylardy!» dep oılaýǵa májbúr bolamyz. Zeınetke áldeqashan shyqsa da olar jyly ornynan ketkisi kelmeıdi.
Elimizde olardyń ornyn basatyn jastar qaı aýylda, qaı jerde bolsyn bar. Mektep memlekettik mekemege jatatyn qazynalyq kásiporyn. Endeshe memlekettik turǵydan rettelip otyrsa esh artyq bolmaıdy. Sizder qalaı oılaısyzdar, aǵaıyn?..
Marat QAShQYNBAEV Almaty oblysy
...rızashylyǵyn jetkizedi
Sý tasqynynan qorqynysh joq
«Sý – tilsiz jaý» demekshi, aýylymyz mol kelgen sýdan kópten beri qıyndyq kórip kele jatqan bolatyn. Tipti turǵyn úılerimizdi sý alyp kete me dep qatty qaýiptenetinbiz. Shýdyń sýy keı jyldary kóp kelip, mazamyzdy alatyn. Qazir ol qaýip seıildi. Sozaq aýdanynyń ákimi S.Polatovtyń yqpalymen «Stepnoı-Rý» ken ornynyń basshylyǵy aýylymyzǵa kólikten kómek berip, on kún boıyna aýyldyń irgesindegi dambany kóterýge qolǵabys berdi.
Endi sý tasqynyna tolyq qarsy tura alamyz dep oılaımyz. Aýyl ákiminiń mindetin atqarýshy Ásıma Myrzabekova ıgi istiń basy-qasynda júrdi. Traktor júrgizýshisi Ǵalymjan Shoqanov on kún boıy dambany bıiktetý jumysymen aınalysty. Tapsyrmany óte tyńǵylyqty júrgizgenine aýyl turǵyndary rıza boldyq. Aýdan ákimine, ken basqarmasynyń basshylyǵyna alǵysymyz sheksiz. Aýyl tóńiregine qandaı sý kelse de endigi jerde qorqynysh joq. Uıqymyz tynysh bolatyn boldy.
Tóregeldi JAPABAIULY, aýyldyq ardagerler keńesiniń tóraǵasy
Ońtústik Qazaqstan oblysy
...úlgi tutady
Ájeler besikke salýdy úıretedi
Halqymyzdyń ejelgi salt-dástúrleriniń biri – balany besikke bóleý. Alaıda onyń qalaı isteletinin keıbir búgingi jas analar bile bermeıdi. Mundaı olqylyqtyń ornyn toltyrý úshin Aqtóbe qalalyq meshitiniń janynan qurylǵan ájeler mektebiniń músheleri osy shapaǵaty men paıdasy mol isti qolǵa aldy. Birinshi kezekte olar besikke salý sábıdiń densaýlyǵy men tazalyǵyna kóp paıdasyn tıgizetini jóninde aıtyp berýdi ádetke aınaldyrǵan. Sondaı-aq bóbektiń boı bitiminiń tik, túzý ósýi ári mazasyzdanbaı tynysh uıyqtaýy úshin de besiktiń septigi mol.
Mektepte sábıdiń eń alǵash kıgen ıtkóılegi, azan shaqyryp at qoıýdyń nege kerektigi, balany qyrqynan shyǵarýdyń paıdasy jóninde de túsinikter beriledi. Aıtalyq sábıdiń eń alǵash ústine kıgizilgen kıimniń ıtkóılek atalýy onyń qýatty, qaıratty bolyp óssin degen ıgi tilektiń týyndaǵanyn estigende tyńdaýshylar tańdanyp qaldy. Buǵan qosa halqymyzdyń uǵym-túsiniginde náresteniń ıtkóılegin sábı súıe almaı júrgen qyz-kelinshekterge yrymdap berý dástúri bar ekeni de aıtylyp júr.
Talshyn QOJAǴMETOVA, Aqtóbe qalalyq áıelderdiń saýat ashý ortalyǵynyń jetekshisi
...maqtan etedi
О́nege bolarlyq óren
Orda buzar jasqa jetken Baqytjan Táshenovtiń kúreske toly ǵumyry ónege desek te bolady. Jasyndaı jarqyraǵan Baqytjan nebári 14 jasynda jeke konserttik keshin berip, juldyzy janǵan bala edi. Alaıda 15 jasynda qan aýrýyna shaldyǵyp, bozbala shaǵyn leıkemııamen kúresýmen ótkizdi. Aýyr dertpen arpalysyp júrip, orta mektepti de oıdaǵydaı aıaqtaǵan Baqytjan hımııa terapııanyń barlyq satysynan ótti.
Biraq sáýleli emniń saldarynan onyń jambas súıekteri mújilip, endo-protezdeý otasy jasaldy. Onyń ústine ishki músheleri – baýyr, búırek, asqazany da syr berip, ınfýzııalyq terapııadan ótti. Janyn jegideı jegen aýrýǵa moıymaǵan jigit joǵary oqý ornyna túsip, zańger mamandyǵyn alyp shyqty. Tapqan-taıanǵanyn ulynyń em-domyna jumsap júrgen ata-anasyna salmaq salmaý úshin Baqytjan toılarda án shyrqap, aqsha jınap, oqý aqysyn da ózi ótegen eken.
«Azamattarǵa arnalǵan úkimettiń» Qaraǵandy oblysy boıynsha fılıalynda 2012 jyldan beri abyroımen qyzmet etip kele jatqan Baqytjan qazir bólim basshysynyń orynbasary ǵana emes, ujymnyń úlgi tutar azamaty, departamenttegi múmkindigi shekteýli qyzmetkerlerdiń kóshbasshysy. «Halyqqa qyzmet kórsetý ortalyǵyna ornalasqannan beri meniń ómirimniń eń jaýapty kezeńi bastaldy. Sebebi ózimniń elime paıda tıgizer jumysqa ornalastym, meniń eń basty maqsatym memleketime paıdamdy tıgizý. Bul jerde qyzmet alýshylardyń «rahmet» degen bir sózi meni jigerlendirip, ómirge degen súıispenshiligimdi arttyra túsedi», – deıdi ol.
Ásel MIZAMQYZY ASTANA
...batasyn beredi Kárige qurmet – balaǵa mindet
Qamqorlyq pen qaıyrymdylyq adam balasynyń boıyndaǵy izgi qasıetter. «Kárige qurmet – balaǵa mindet» deıdi, halqymyz. Shetpe jastar ortalyǵynyń bastamasymen qolǵa alynǵan «Jaqsylyq jasaıyq» qaıyrymdylyq sharasy aýdan ortalyǵynda sátti júzege asyp keledi. О́tkende shetpelik jastar tyl jáne eńbek ardageri Tamara Emzeevanyń úıine baǵyt aldy. Tamara ájeı osy kúnge deıin múgedek joldasyn bir ózi baǵyp, asyrap keldi. Jýyrda joldasy Serikbol Emzeev qaıtys boldy. Shetpelik belsendi jastar Tamara ájeıdiń úıi men qora aınalasyn kúl qoqystan tazalap, jaqsylyqtaryn aıamady. Jastarǵa dán rıza bolǵan qart ájeı alǵysyn bildirdi.
Tek Shetpe selosy aýmaǵynda ǵana emes, sonymen qatar Qosbulaq, Ondy, Ushtaǵan, Jyńǵyldy aýyldarynyń jastary da belsendilik tanytýda.
Allabergen QONARBAEV Mańǵystaý oblysy