Oıda bolǵanymen josparda joq-tuǵyn. Eýropa lıgasynyń mańyzdy kezeńinde ketip qalǵany qyzyq boldy. «Astanaǵa» qıyn boldy. Patrık Tvýması ketedi dep shýlap-týlap júr edik, aıaq astynan Kabanangany shyǵaryp saldyq. Amal joq, endi «Astana» Eýropa lıgasyndaǵy joryǵyn Kabanangasyz jalǵastyrady.
«Boz bala bolyp kelip edim, kemeldengen shaǵymda ketip baramyn. Maǵan degen ystyq yqylastaryńyzdy, jaqsylyqtaryńyzdy, qoldaýlaryńyzdy umytpaımyn. «Astana» komandasy, Qazaq eli meniń máńgi júregimde», dep Kabananga alǵys aıtyp, jyly lebizin bildiripti.
Kongolyq shabýylshy Saýd Arabııasynyń «Al-Nasr» klýbyna aýysty. Transferlik quny 2 mln eýroǵa baǵalanypty. Bul Qazaqstan fýtbolynyń tarıhynda buryn-sońdy bolmaǵan eń iri transferlik kelisim. Marketıngtik, ımıdjdik turǵydan «Astana» kózdegenine jetti deýge de bolady. Qomaqty qarjy tapty. Oǵan endi «jorytqanda jolyń bolsyn!» deımiz.
Qansha degenmen Kabananga joqtan gol jasaıtyn, joıqyn soqqylarymen, sheber tehnıkasymen, jyldamdyǵymen, ózine degen senimdiligimen, erekshe oıynymen kózge túsken oıynshy. «Astana» qarjy jaǵynan paıda tapqanmen, aldaǵy «Sportıngpen» óter qos oıyndy qalaı ótkizbek? Kabanagany dál osy shaqta jibergeni durys boldy ma? Portýgalııalyqtarmen oıynda onyń ornyn kim basady? Mine, osy tektes suraqtar qazir qazaq jankúıerleriniń kókeıinde turǵany anyq. Sol sekildi bas bapker Stanımır Stoılovtyń basty ýaıymyna aınalǵany anyq. Kabananganyń qanshalyqty qajetti oıynshy ekenin aldaǵy qos oıynnyń qorytyndysynan baıqaıtyn bolamyz.
Deı turǵanmen taıaqtyń ekinshi sheti baryn da umytpaıyq. Endi únemi qosalqy quramda qalyp júretin Roman Murtazaev, Djordje Despotovıch sekildi fýtbolshylarǵa jol ashyldy. Sondaı-aq, úıirine qaıta qosylǵan Baýyrjan Jolshıev oqý-jattyǵý jıynynda jaqsy qyrynan kórinip, Stanımır Stoılovtyń senimine qaıta kirse, burynǵy babyna qaıta oralýy múmkin.
Stoılov tusynda «Astananyń» birqatar mańyzdy oıynshysy ketti. Biraq bolgar mamany ylǵı da laıyqty oıynshylar alyp, maýsym sońynda joǵary nátıjelerge jetip júrdi. Qysqasy ketken shákirtiniń ornyn joqtatpady. Stoılovtyń bul joly da bir bilgeni bolar degen úmit joq emes. Qara Qabylanǵa aldaǵy ýaqytta sáttilik, al «Astanaǵa» «Sportıngpen» óter qos oıynda tek jeńis tileımiz!
Erkebulan JOMART, «Egemen Qazaqstan»