Ulttyq ulan Bas qolbasshylyǵynda qylmyskerge izin jasyrýǵa jol bermeı, qolǵa túsirgen maıor Tımýr Rahımovty qurmetteýge arnalǵan kesh ótti.
Sharaǵa ardagerler, áskerı qyzmetshiler jáne maıor Tımýr Rahımovqa batyldyǵy men erligi úshin alǵysyn bildirýge kelgen japa shegýshiniń jaqyndary qatysty.
Eske túsirip ótsek, oqıǵa 29 qańtar kúni túngi 23.00 shamasynda oryn alǵan. Qyzmetten keıin úıine oralǵan Ulttyq ulannyń 3660 áskerı bóliminiń ofıseri maıor Tımýr Rahımov aýlada janjaldasqan eki adamdy baıqaıdy. Sol sátte dereý oqıǵa ornyna qaraı júgiredi.
– Alǵashqyda jigit pen qyz arasyndaǵy jaı urys-keris bolar dep oıladym. Alaıda artynan qol jumsaý bastaldy, shabýyl jasaýshynyń oıy aram ekenin túsindim. Men aıqaı saldym, jigit qasha jóneldi, – deıdi óz oıymen bólisken maıor T.Rahımov.
Kúdiktini ulandyq ofıser qýyp jetken boıda qoıan-qoltyq urys ádisimen qolǵa túsiredi. Ile ony ishki ister organdary qyzmetkerleriniń qolyna tabystaıdy.
Keıin belgili bolǵandaı, qaskóı álgi jábirlenýshi qyzdyń «iPhone-7» uıaly telefonyn tartyp alyp, izin jasyrmaq bolǵan. Qylmys ornynan pyshaq pen qyzdyń sómkesi tabylǵan. Qyz Astana qalasynyń turǵyny bolyp shyqty. Al kúdikti buǵan deıin jasaǵan qylmysy úshin Reseıde 10 jyl jazasyn ótegen kórinedi.
Kórsetken erligi men qyraǵylyǵy, qylmyskerdi qolǵa túsirýdegi batyldyǵy úshin Ulttyq ulan Bas qolbasshysynyń buıryǵymen maıor Tımýr Rahımov saltanatty sharada «Quqyqtyq tártip áskerine – 25 jyl» medalimen marapattaldy.
Japa shegýshi qyzdyń aǵasy Murat Kósherbaı marapat ıesine alǵysyn bildirdi. Onyń aıtýynsha, sýyq aýa raıy men kesh mezgilge qaramastan ofıser janjaldyń órshýine jol bermeı, aıbyroımen mindetin atqaryp, qaskóıge qashyp ketýge múmkindik bermegen.
Ulandyqtyń ózi bolsa, muny er azamattyń mindeti sanaıdy. Kez kelgen er jigit, jaýynger qyzdy ózi sekildi qorǵap qalar edi dep oılaıdy. О́ıtkeni qaýipsizdik pen tynyshtyqty qamtamasyz etý – ár ofıserdiń mindeti.
– Biz halyq úshin qyzmet atqaramyz. Halyqty qorǵaý – áskerı qyzmetshiniń mindeti. Bul áreketim basqa qarýlastaryma úlgi bolsa eken, – deıdi maıor.
Astanalyq áskerı bólim komandıriniń tárbıe jáne áleýmettik-quqyqtyq jumystar jónindegi orynbasary laýazymynda qyzmet atqaratyn Tımýr Rahımov keshke jubaıy jáne eki balasymen birge keldi. Barsha qaýym jyly sózderin kesh ıesine arnasa, án-bı ansambliniń ónerpazdary patrıottyq ánder oryndady.