Ońtústik Qazaqstan oblysynda elimizde alǵash bolyp qolǵa alynǵan modýldi quramaly 20 medısınalyq pýnkt paıdalanýǵa berildi.
Ashylý saltanatyna qatysqan Ońtústik Qazaqstan oblysynyń ákimi Janseıit Túımebaev halyqtyń densaýlyǵyn saqtaý – memleket úshin asa mańyzdy másele bolyp tabylatynyn aıtty.
- Joldaýda Memleket basshysy tıimdiligi az jáne memleket úshin shyǵyny kóp dıspanserlik em qoldanýdan negizgi sozylmaly aýrýlarǵa alystan dıagnostıka jasap, sondaı-aq osy salany ambýlatorlyq emdeý arqyly basqarýǵa kóshý qajet ekenin atap ótken bolatyn. Iаǵnı, medısına mekemeleri ozyq medısınalyq qural jabdyqtarmen qamtamasyz etilip, dárigerler halyqqa sapaly qyzmet kórsetýi tıis.
Osy baǵyttaǵy jumystardy jandandyrý maqsatynda oblys ákimdigi tarapynan tıisti jumystar atqarylyp jatyr. Máselen, medısınalyq tirekterdiń qurylysyn júrgizýge modýldik konstrýksııa úlgisi usynylyp otyr. Modýldik konstrýksııany qurastyrý tásili ýaqytty jáne bıýdjet qarajatyn tıimdi jumsaýǵa oń áserin tıgizedi. Osyndaı medısınalyq tirekte naýqastarǵa birinshi medısınalyq sanıtarlyq kómek kórsetiletin bolady, - dedi oblys ákimi.
2017 jyly oblys boıynsha 33 densaýlyq saqtaý nysany paıdalanýǵa berilgen bolatyn. Jalpy, Ońtústik Qazaqstan oblysy boıynsha 846 medısınalyq nysan bar bolsa, onyń ishinde 225-i medısınalyq tirek bolyp tabylady.
Baqtııar TAIJAN
«Egemen Qazaqstan»
Ońtústik Qazaqstan oblysy