Jahan jurtshylyǵy asyǵa kútken fýtboldan álem chempıonaty bıyl Reseıde ótetini kópshilikke belgili. Osyǵan oraı dúnıejúzilik teńbil dop básekesiniń basty júldesi, salmaǵy 6 kılo tartatyn altyn kýbok Almatyǵa keldi. Esterińizde bolsa, alǵash ret Álem kýbogy Almatyǵa 2010 jyly kelgen bolatyn. Qazaqstan osy trofeıdi ekinshi ret qabyldaǵan Ortalyq Azııadaǵy alǵashqy memleket atanyp otyr.
Álem chempıonattarynyń aldynda ótkiziletin dástúrli týr 9 qyrkúıek kúni Máskeýdegi «Lýjnıkı» stadıonynda bastalǵan. Basty trofeıdi áýejaıdan kútip alǵan almatylyqtar, artynsha osy tarıhı sáttiń qurmetine oraı qaladaǵy «Mega» ortalyǵynda bas qosty. Bul Almaty turǵyndaryna ǵana emes, búkil elimizge FIFA-nyń resmı ókilderi tarapynan jasalǵan úlken syı, qaıtalanbas estelik dep aıtýǵa bolady.
FIFA ókilderimen qatar Almatyǵa kelgen áıgili fransýz fýtbolshysy, álem jáne Eýropa chempıony Krıstıan Karambıo bul tarıxı oqıǵanyń mańyzyn erekshe atap ótti. Sonymen qatar tanymal fýtbolshy qonaqjaılylyq úshin alǵysyn bildirip, tilshilerdiń barlyq suraqtaryna jaýap bere otyryp, kýbok 9 eldi aralap úlgergenin aıta ketti. Onyń aıtýynsha bul trofeı bizdiń elge Pákistannan kelip, óz saparyn Qyrǵyzstanda jalǵastyrmaq.
– Qazaqstan úshin bul úlken qýanysh. Biz Álem kýbogyn óz qalamyzda tamashaladyq. Áserimdi aıtyp jetkize almaspyn. Árıne elimizdiń qurama komandasy bul dodaǵa qatyspaıtyny ókinishti-aq. Biraq búgin fýtboldyń jankúıerleri úshin úlken mereke. Uıymdastyrýshylarǵa osyndaı múmkindik syılaǵany úshin sheksiz alǵysymdy bildiremin, – deıdi qala turǵyny Temirlan Qýanyshev.
Teńbil dop dodasynyń eń basty trofeıiniń kelýine oraı jınalǵan qonaqtardyń aıtýynsha, bul álem sportyndaǵy aýqymdy oqıǵa tek qýanyshtyń belgisi. Qonaqtarǵa alǵysyn bildirgen Almaty qalasy ákiminiń orynbasary Arman Qyryqbaev ta bul sózdi qýattap, bul elimiz úshin úlken abyroı ekenin jetkizdi.
Atalǵan joba 2006 jyldan beri álemdik fýtbol qaýymdastyǵy men Coca-cola kompanııasynyń muryndyq bolýymen iske asyp kele jatyr. Uıymdastyrýshylar Almaty ákimdigine kýboktyń kishi nusqasyn syılap, qoldaý kórsetkenine alǵys bildirdi. Sondaı-aq sharaǵa jınalǵan barlyq qonaqtar Álem kýbogynyń janynda estelik sýretke túsip, máre-sáre bolyp tarqasty.
Arman OKTIаBR, «Egemen Qazaqstan»
ALMATY