Ortalyq kommýnıkasııalar qyzmetinde mindetti áleýmettik saqtandyrý júıesiniń elimizde qyzmet atqarýynyń ózekti aspektilerine arnalǵan baspasóz máslıhaty ótti.
Is-sharaǵa «Memlekettik áleýmettik saqtandyrý qory» AQ-nyń prezıdenti Sáýle Dúısenova jáne basqarýshy dırektory Nursulý Kemel qatysty. Jıyn barysynda Sáýle Dúısenova 2017 jyly 772 myńnan astam qazaqstandyqtar Memlekettik áleýmettik saqtandyrý qorynan 156,5 mlrd. teńge mólsherinde áleýmettik tólemder alǵanyn málimdedi.
«2017 jyly 772 myńnan astam qazaqstandyqtar Memlekettik áleýmettik saqtandyrý qorynan 156,5 mlrd. teńge mólsherinde áleýmettik tólemder aldy. Júktilik pen bosanýǵa, jańa týǵan balany asyrap alýǵa jumsalǵan qarjy 62,2 mlrd. teńgege jetse, balanyń bir jasqa tolýyna baılanysty kútimine 74,1 mlrd., eńbekke jaramsyzdyqqa qatysty 9,9 mlrd., asyraýshysynan aıyrylý boıynsha 7,8 mlrd. jáne jumyssyz qalýǵa qatysty 2,1 mlrd teńge qarastyrylǵan. 2018 jyly 1 qańtardaǵy jaǵdaı boıynsha Qazaqstanda 5,9 mln. adam úshin áleýmettik aýdarymdar jasaldy. Áleýmettik aýdarymdar jumysshynyń eńbekaqysynan ustalynbaıdy, olar jumys berýshiniń qarjysy esebinen tólenedi. Demek jumysshy óz menshik qarajatyn jumsamaıdy. Áleýmettik aýdarymdardyń mólsherlemesi tabystyń 3,5 paıyzyn quraıdy. Áleýmettik tólemderdiń satyp alý qabilettilikterin qoldaý maqsatynda makroekonomıkalyq parametrlerdiń ózgeristerin, onyń ishinde qunsyzdanýlardy eskere otyryp, MÁSQ aktıvteriniń esebinen ár jyl saıyn eńbek etý qabiletinen jáne asyraýshysynan aıyrylýy boıynsha tólemderdiń mólsheri ósip otyratynyn atap ótý qajet. 1 qańtardan bastap osy sanattaǵy 100 myńǵa jýyq tólem alýshylarǵa áleýmettik tólemder mólsheri 16 paıyzǵa arttyryldy», dedi ol
Mindetti áleýmettik saqtandyrý – bul eńbek etý qabiletinen, otbasy asyraýshysynan, jumysynan aıyrylǵanda, júktiligine jáne bosanýyna baılanysty nemese jańa týǵan balany asyrap alǵanda, sonymen qatar bala 1 jasqa tolǵanǵa deıingi kútimine baılanysty tabysynan aıyrylǵan jaǵdaı týyndaǵanda, jumys isteıtin halyqty qoldaý úshin qosymsha qorǵaý deńgeıi ekenin atap ótken jón.
«Osy atalǵan jaǵdaılarda júıege qatysýshy nemese onyń otbasy memleket tóleıtin áleýmettik járdemaqylarǵa qosymsha MÁSQ áleýmettik tólemder alady. Qazaqstanda mindetti áleýmettik saqtandyrý júıesi engizilgen sátten bastap 4 mln. jýyq adam MÁSQ-nan jalpy somasy 905 mlrd. teńgeden astam áleýmettik tólemder aldy», dedi «Memlekettik áleýmettik saqtandyrý qory» AQ-nyń prezıdenti Sáýle Dúısenova.
AQ-nyń prezıdenti Sáýle Dúısenova jáne basqarýshy dırektory Nursulý Kemel elimizde ana men balany áleýmettik qoldaý turaqty júrgizilip kele jatqanyn tilge tıek etti.
«Elimizde ana men balany qoldaý máselesi keshendi túrde qolǵa alynǵan. Bul tusta 2008 jyly júktilikpen 1 jasqa deıingi bala kútimine baılanysty áleýmettik tólemderdi Mindetti áleýmettik saqtandyrý qorynan jumys isteıtin azamattarǵa taǵaıyndaý engizilgen. Bıyl oǵan 10 jyl boldy. Osy oraıda ana bolamyn degen áıel jumys isteıtinine nemese jumys istemeıtinine baılanysty tıisti áleýmettik tólemderin alady. Eger ana bosanǵannan keıin jumys istemeıtin bolsa, onda jumys istemeıtin ana retinde memlekettik járdem aqy qarastyrylǵan. Iаǵnı, balanyń týylýyna oraı balanyń retine baılanysty 1 jáne 2-i,3-i bala bolsa, tıisti mólsherde bir rettik memlekettik járdemaqyny alady. Bul bıylǵy jyly 91 390 teńgeni quraıdy. Keıingi alatyny bala týylǵannan keıin, týý týraly kýáligin berip, 1 jasqa deıingi bala kútimine baılanysty, balanyń sanyna baılanysty 13 853 teńgeden bastap, 21 405 teńge aralyǵynda járdemaqyny ala alady. Al eger jumys isteıtin ana bolsa, onda ol júktiliktiń 30 aptasynan keıin baryp Eńbek zańnamasyna sáıkes jumys berýshige baryp, tıisti júktilikke baılanysty demalysqa shyǵady. Bul demalys qalypty jaǵdaı 126 kúnge beriledi. Osy ýaqyt aralyǵynda áıel úıinde otyratyn bolǵandyqtan, osy aralyqta onyń tabysy bolmaıdy. Osy tabysty óteý úshin Mindetti áleýmettik saqtandyrý qorynan júktilikke jáne bosanýyna baılanysty bir rettik áleýmettik tólem qarastyrylǵan. Iаǵnı júktilikpen baılanysty otyrǵan barlyq kúndegi tabysyn osy qor arqyly óteı alady. Sáıkesinshe bala týylǵannan keıin balanyń týylýyna oraı memleketti járdem aqy bar. Ol da balanyń sanyna baılanysty, 1,2,3-i balaǵa 91 390 teńgeni quraıdy. Al 4-i jáne odan da kóp bala bolsa, onda 151 515 teńgeni quraıdy», dep atap ótti ol.