Erteń Ońtústik Koreıanyń Phenchhan qalasynda XXIII Qysqy Olımpııa oıyndary saltanatty jaǵdaıda ashylady. Bul Ońtústik Koreıada ótetin alǵashqy, Azııa qurlyǵynda Sapporo (1972) men Naganodan (1998) keıingi úshinshi Aq Olımpııa oıyndary bolmaq.
Derek úshin aıta ketsek, Qysqy Olımpıadaǵa qatysatyn quramalar arasynda sportshylar sany boıynsha AQSh alda tur. Bul elden sporttyń barlyq túri boıynsha 242 sportshy qatysady. Kanada – ekinshi orynda. Úıeńki japyraqty elden Phenchhandaǵy dodaǵa 226 sportshy qatysady. Al Olımpııa oıyndaryna alǵash ret qatysaıyn dep jatqan alty memleket bar. Olar: Ekvador, Erıtreıa, Kosovo, Malaızııa, Nıgerııa jáne Sıngapýr.
Olımpıada básekeleri eki klasterde, ıaǵnı Phenchhan taý klasteri men Kannyn jaǵalaý klasterinde ornalasqan 12 sport kesheninde ótedi. Bıylǵy aq qar, kók muz ústindegi alamanda álemniń 92 elinen 2925 qysqy sporttyń nebir has sheberleri baq synaıdy. Mamandardyń aıtýynsha, bıyl Olımpııa oıyndaryna qatysýshylardyń sany rekordtyq kórsetkishke jetken.
Ár tórt jyl saıyn ótetin baıraqty básekege Qazaqstan quramasy sapynan 46 sportshy qatysatynyn, olar sporttyń toǵyz túrinen jalpy sany 57 joldama alǵanyn gazetimizdiń ótken sandarynda keńinen jazǵan bolatynbyz.
Elimizdiń short-trek qurama komandasy Olımpıada aýylyna tórt kún buryn ornalasyp, eldiń klımat jaǵdaıyna beıimdelip qalǵan. Short-trekshiler Olımpıadaǵa deıin Japonııada daıyndalyp, Phenchhanǵa sol elden barǵan. Olar tórtinshi aqpannan beri Kannynnyń negizgi jáne qosymsha muz aıdyndarynda Nıderland sportshylarymen birge jattyǵyp jatyr. Esterińizge sala keteıik, qazaqstandyq short-trekshiler negizi áý basta on lısenzııany jeńip alǵan. Keıinirek oǵan taǵy eki kvota qosyldy. О́ıtkeni Shvesııa ulttyq olımpıadalyq komıteti 1500 metr qashyqtyqtaǵy lısenzııasynan bas tartqandyǵyn málimdedi. Sondaı-aq Halyqaralyq Olımpıada komıteti reseılik short-trekshilerdi Phenchhan oıyndarynan shettetip tastaǵan. Sóıtip Qazaqstan quramasynyń qorjynyna taǵy eki joldama túsken-di.
Olımpııa oıyndarynyń ashylý saltanatynda elimizdiń kók týyn ustap shyǵatyn Abzal Ájǵalıev Olımpıada aldynda azdap qobaljý bar ekenin aıtady. Sebebi týdy ustap shyǵýmen qatar, elge kók týdy bıikke kóterip, medalmen oralý mindeti júktelgenin de sezinedi. «Azdap qobaljý bar ekenin jasyrmaımyn. Baıraqty ustap shyǵýmen qatar, onyń jaýapkershiligi degen bar. Barlyq qazaqstandyq jankúıerler bizge úmit artyp, medal kútip otyr. Osy jarysqa tyńǵylyqty daıyndalyp, Olımpıada barysynda joǵary jetistikterge jetemin dep oılaımyn», dep aǵynan jaryldy Abzal Ájǵalıev.
Sheteldik «Gracenote» statıstıkalyq agenttigi Phen-chhanda bastalatyn HHIII Qysqy Olımpııa oıyndarynda Ońtústik Koreıa jerinde Germanııa quramasy jalpykomandalyq esepte birinshi oryn alady dep boljaýda. Agenttik sarapshylary nemis sportshylary 15 altyn, 10 kúmis, 14 qola medal enshileıdi dep topshylap otyr. Ekinshi orynǵa Norvegııa sportshylaryn qoıǵan. Skandınavııa túbeginiń ókilderi 13 altyn, 14 kúmis, 13 qola medal jeńip alýǵa qaýqarly eken. Úzdik úshtikti AQSh quramasy (11 altyn, 6 kúmis, 12 qola) túıindeıdi dep boljanyp otyr.
Qoryta aıtar bolsaq, aldaǵy alamannan elimizdiń sportshylary naqty qansha medal alatynyn biz de, siz de tap basyp boljaı qoımaspyz, biraq sportshylarymyzdyń daıyndyǵy óte joǵary deńgeıde ekenine kózimiz jetip otyr. Qazaqta balasy atqa minse, anasy úıde otyryp taqym qysady deıdi ǵoı. Baıraqty básekede synǵa túsetin saıypqyran sańlaqtarymyzǵa sáttilik tilep, elge medalmen abyroıly oralýyn tileımiz.
Álı BITО́RE,
«Egemen Qazaqstan»