Hosh, sonymen mıllıondaǵan jankúıerlerdiń júregin lúpildetken Phenchhandaǵy Aq Olımpıada oıyndary búgin keshki saǵat 20.OO-de (elimizde keshki beste) Ortalyq stadıonda saltanatty túrde ashylyp, úsh-tórt saǵat boıy kórermenderdi qyzyqqa bólemek. Ázirshe Olımpıadany uıymdastyrýshylar ony qupııa ustap otyr.
Bul jolǵy Aq Olımpıadanyń ereksheligi, sońǵy jyldary dúrdaraz bop kelgen, týysqan bir halyq bolsa da qarym-qatynasyn jaqsartýdyń ornyna salqyndatyp jibergen Soltústik Koreıanyń tońy jibip, Phenchhandaǵy Olımpıadada bir tý astynda óner kórsetýi beıbitshilik súıgish qos káris halqyn qýanyshqa bóledi.
Keshe elimizdiń Mádenıet jáne sport Mınıstri Arystanbek Muhamedıuly, frıstaıldyń akrobatıka túrinen jarysqa túsetin Janbota Aldabergenova, Aqmarjan Qalmyrzaeva, Marjan Aqjigit, Aıana Joldas, «Samuryq-Qazyna» ulttyq ál-aýqat qory demeýshiligimen el sańlaqtaryna janashyr bolyp kelgen bir top eńbek ozattary Phenchhan men Kannyn klasterindegi qonaqúılerge ornalasty.
- Bul meniń tuńǵysh Olımpıadam. Janbotaǵa qaraǵanda tájirıbemniń kem soǵyp jatqanyn ózim de sezemin. Desek te, namysty janyp, qurbylarymmen birge bar kúshimizdi salyp sekirýge kúsh salamyz,-deıdi Aqmarjan Qalmyrzaeva.
Segizinshi aqpanda frıstaıldyń mogýl túrimen sekirýshiler «Fenıks snoý parkte» jattyǵýlar jasady. Nebári úsh jasynda shańǵyǵa turǵyzyp, tórt jasynda asa qaýipti frıstaılge baýlyǵan Aıaýlymnyń ákesi Serik Ámirenov, talantty shańǵyshy, Almatyda ótken qysqy Ýnıversıada oıyndarynda altynnan alqa taqqan shemonaıhalyq Ivan Lıýftiń turaqty demeýshisi, isker azamat Sergeı Glýshkov úsheýimiz frıstaılshylardyń jattyǵýyn tamashaladyq. Medaldan úmitker Iýlııa Galysheva, Dmıtrıı
Reıherd, Pavel Kolmakovtyń kóńil-kúıleri kóterińki, senimdi aqtaýǵa kúsh salatyndaryn aıtty.
- Erteń irikteý jarysy bastalady. Úzdik óner kórsetken jıyrma sańlaq kelesi aınalymǵa shyǵady. Odan keıin I2, sosyn úzdik degen altaý aqtyq synda medaldardy sarapqa salady. Iýlııa men Dmıtrıı osy joly qalaıda medal alyp, jankúıerlerdi qýantsaq degen oıda, al men jıyrmalyqqa ensem- jaman bolmas edi,-deıdi nebári on alty jasar Aıaýlym Ámirenova.
Keshe shańǵymen tuǵyrdan sekirýshiler irikteý saıysyn bastady. Ázirshe S.Tkachenkonyń nátıjesi kóńil kónshiter emes. Onynshy aqpanda shańǵyshylar, short-trek sheberleri, shana sporty boıynsha saıystar ótedi. Hosh sonymen, Aq Olımpıada bastaldy. Úmit úzilmesin deıik!
Ońdasyn Elýbaı, jýrnalıst
Arnaıy «Egemen Qazaqstan» gazeti úshin Phenchhannan