Almatyda Iran ıslam Respýblıkasynyń Bas konsýldyǵy janyndaǵy Mádenı ókildigi jáne T.Júrgenov atyndaǵy Qazaq Ulttyq óner akademııasynyń uıymdastyrýymen Iran Islam Respýblıkasy táýelsizdiginiń jáne Islam revolıýsııasy jeńisiniń 39 jyldyǵy mereıtoıyna arnalyp «Iran eliniń ulttyq qolóneri» atty kórmesi ashyldy.
Álemdegi eń kóne órkenıet oshaqtarynyń biri, Fırdoýsı, Haııam, Saadı jáne Hafızdyń Otany. Iran dese kóńilimizde Parsy eliniń saltanatty sáýlet óneri, meshitterdiń kún tústes kúmbezderi, kózdiń jaýyn alar oıýlary men naqyshtary, ásem ydys–aıaǵy men úı jaraqtary, kóne saraılar men kitap betteriniń qaıtalanbas mınıatıýralary, sýret óneri men qolóneri qylań beretini sózsiz. Iran mádenıeti men qolóneri álemdik óner murasy men jetistikteri aıdynynda ózine laıyq orny men qurmetin tapqan jáne óner súıer qaýym úshin árqashan asyǵa kútetin merekege aınalǵan.
Atalǵan kórmede Iran qolóneriniń talantty ónerpazdarynyń, sýretshileriniń, mınıatıýrshylarynyń, kórkem jazý jáne aǵash óneri sheberleriniń týyndylary kórermen nazaryna usynylady. Sonymen qatar kórkem jazý óneri boıynsha sheberlik sabaqtary ótkiziledi.
Kórmeniń ashylý saltanatyna Almaty qalasyndaǵy Iran Islam Respýblıkasynyń Bas konsýldyǵy janyndaǵy mádenı ókildik basshysy Seıed Djavad Djalalı Kııasarı, Bas konsýl Hamıd Reza Arshadı, qazaqstandyq mádenıettanýshy ǵalymdar, ónertanýshylar, ustazdar men stýdentter qatysty.
О́nerdiń tylsym syryn uqtyrar ǵajaıyptar qoıylǵan kórmede mozaıka, mınıatıýra, aǵash oıý jáne jazý óneri eksponattary sizge sol syrdan úzik-úzik oı aıtar dep oıladyq. Qaǵaz ben temir betine tógilgen myń-san órnekter qııalyńdy áldılep qanat bitirgendeı bolady.Tamsanyp kórip keremet ónerge tańdaı qaǵasyz.
Saparbaı PARMANQUL,
«Egemen Qazaqstan»
ALMATY