Fýtzaldan Qazaqstan quramasy Eýropa chempıonatynyń jartylaı fınalynda Ispanııadan jeńilip qaldy. Deı turǵanmen jankúıer qaýym naǵyz tartysty básekeniń kýási bolǵany anyq. Oıynnyń negizgi ýaqyty 5:5 esebimen aıaqtalǵanmen, penaltı serııasynda 3:1 esebimen ıspanııalyqtar basym boldy.
Otandastarymyz kezdesýdiń 8-mınýtynda alǵa shyqty. Bul goldy Dýglas Jýnıordyń pasynan keıin Taınan óz enshisine jazdy. Biraq úziliske deıin ıspandar tarazy basyn teńestirip qana qoımaı, esepte alǵa shyqty. 16-mınýtta Shyńǵys Esamanov buryshtamadan kelgen dopqa aıaǵyn yńǵaısyz qoıyp, óz qaqpasyna soǵyp alsa, 19-mınýtta Mark Tolra óz quramasyn alǵa shyǵardy.
Al ekinshi taımdy Kakaý shákirtteri jańa qarqynmen bastady. Bombardır qaqpashymyz Igıta 25-mınýtta Dýglas Jýnıordyń pasynan keıin joıqyn soqqysymen qarsy qaqpany dál kózdep, 2:2-ge jetkizdi. Araǵa 45 sekýnd salyp Pavel Taký quramamyzdyń úshinshi dobyn saldy. Bul jolǵy nátıjeli pastyń avtory da - Dýglas Jýnıor.
Pıreneı túbeginen kelgen qurama qol qýsyryp qarap otyrmady. Osydan keıin ótkir shabýyldaryn biriniń artynan birin uıymdastyrdy. Nátıjesinde 28-mınýtta Hoselıto esepti teńestirse, tórt mınýttan keıin Pola tablodaǵy kórsetkishti 4:3-ge jetkizip, Ispanııany alǵa shyǵardy. Al 39-mınýtta Dýglas Jýnıordyń ózi esepti teńestirdi.
Munan keıin qos komanda arasyndaǵy tartys overtaımǵa ulasty. Alǵashqy ekstra-taımda Mıgelınanyń penaltıden soǵatyn sáti bolǵan. Alaıda múmkindigin jiberip aldy. Biraq 43-mınýtta osy qateligin jýyp-shaıyp, Ispanııanyń besinshi dobyn saldy. Alyspaı berispeıtin Qazaqstan quramasy 48-mınýtta esepti 5:5-ke jetkizdi. Goldyń avtory - Serik Jamanqulov.
Al penaltı serııasynda Ispanııanyń joly boldy. Alǵash bolyp núktege kelgen quramamyzdyń oıynshysy Taınan múlt ketti. Qorytyndy esep 1:3.
Jartylaı fınaldyń ekinshi jubynda Portýgalııa 3:2 esebimen Reseıden basym tústi. Endi 3-oryn úshin ótetin oıynda Qazaqstan 10 aqpan kúni 23:00-de (Astana ýaqyty boıynsha) Reseımen synǵa tússe, chempıondyq ataqty Ispanııa men Portýgalııa ózara sarapqa salady. Fınaldyq oıyn 11 aqpan kúni 02:00-de (Astana ýaqyty boıynsha) ótedi.
Aıta keteıik, sońǵy ret 2016 jyly ótken Eýropa chempıonatynda Qazaqstan quramasy qola júldeger atanǵan.