Pavlodarda «Ertis yrysy» jármeńkesi ótti

Aqsý qalasy aýyldyq aýmaǵynyń «Alına», «Bastaý», «Katıýsha», «Mamadalıev», «Ásel jáne K», «Aqqý», «Zaman», «Qyzyljar-Qus» JShS, «Jamanov» jáne «Reı-Agro» JK jáne basqa da ónim óndirýshilerdiń de ónimderi turǵyndarǵa jaqsy tanys. Izdegenińizdi jármeńkeden tabasyz. Aýyldyń taza ónimi. 

Baǵalar bazarlar men shaǵyn dúken­derdegi baǵadan áldeqaıda tómen. Aýdan­dardan jetken sharýashylyqtar sıyr, jylqy, qoı etin, 1,5 tonna qus etin, 15 tonna kartop, 9 tonna sábiz, 3 tonna qyzylsha, 6 tonna qyryqqabat jáne taǵy basqa ónimder ákelipti. Sıyr etiniń bir kılosy 1400 teńgeden saýdalansa, jylqy eti 1500 teńgeden, kartop, kókónis ónimderiniń quny 75-80 teńge aralyǵynda. Al Aqsýda jármeńke «Aýyl bazarynda», Ekibastuzda «Aýyl» bazarynda aıyna eki ret ótedi. 

Baıqaǵanymyzdaı, oblys ortalyǵy aýyldyq aýmaǵyna qarasty aýyldardan, Aqsýdan, Pavlodar aýdany aýyldarynan keletin aǵaıyndar qurttyń ashysyn da, táttisin de jasap, qaımaq, sút, qoldan uıytqan aıran, maı, kilegeı, talqan, súzbesi deısiz be, bári bar. Syı-sııapatqa qajet qolóner buıymdaryn da tastamaı jármeńkege alyp keledi. Qorasyndaǵy malyn baǵyp, ósirip, óz ónimin ózderi jasap daıyndap, senbi saıyn arqalanyp qalaǵa jetedi. Nátıjesinde otbasynda bereke, bala-shaǵa toq, aman-esen. Úıdegi sharýashylyǵynyń zeıneti degen osy.

Oblys ákimdiginiń málimetinshe, senbi saıyn jármeńke ótkizýdegi maqsat – oblys ortalyǵy turǵyndarynyń 20 paıyzyn arzan ónimmen qamtý. Bul aýylsharýashylyq ónimderiniń, azyq-túliktiń baǵalaryn turaqtandyrýǵa múmkindik beredi. Iаǵnı turǵyndar bir aptaǵa jeterlik qoryn satyp ala alady. Baǵa saıasatyn turaqtandyrý jármeńke ótkizýmen de shektelmeıdi.

– Sondyqtan bıyl «Pavlodar» áleýmettik-kásipkerlik korporasııasy» AQ arqyly da qus eti, qııar, qyzanaq, kúrish, qant, ósimdik maıy sııaqty ónim­der satyp alyndy. Bul azyq-túlik ónim­deri áleýmettik dúkender arqyly saýdalanýda, – deıdi oblys ákiminiń orynbasary Baýyrjan Qasenov. 

Jalpy, jármeńke – sharýa qojalyq­tarǵa da, taýar óndirýshilerge de, tutyný­shyǵa da tıimdi. Bul aýylda jasalatyn, óndiriletin ónimderdi ótkizýdiń utymdy joly.

Farıda BYQAI, «Egemen Qazaqstan»

Pavlodar oblysy