Astanada medısına salasy sıfrlandyrý júıesine birtindep kóshe bastamaq. Bul týraly keshe qalalyq ákimdikte ótken brıfıngte elorda densaýlyq saqtaý basqarmasynyń basshysy Kamaljan Nadyrov baıandady.
Basqarma basshysynyń aıtýynsha, densaýlyq saqtaý salasyn sıfrlandyrý eń aldymen qaǵazbastylyqtan arylýǵa kómektesip, halyqqa kórsetiletin qyzmet sapasyn elektrondy júıe arqyly arttyrýǵa septigin tıgizbek. Jalpy bıyldan bastap, el aýmaǵynda elektrondy densaýlyq pasportyn kezeń-kezeńimen engizý josparlanǵany belgili. Osy jyly Batys Qazaqstan, Shyǵys Qazaqstan, Qaraǵandy men Qostanaı oblystarynyń densaýlyq uıymdary is-qaǵazdaryn elektrondy formatta júrgize bastasa, kelesi jyldan bastap birtindep jańa elektrondy tólqujatqa kóshedi. Bul qujatta emhanaǵa qaralǵan ár naýqastyń syrqat tarıhy men tapsyrǵan analızderiniń qorytyndysy, dáriger tarapynan qoıylǵan dıagnozdary men qaralǵan aýrýhanalarynyń tizimi engiziledi. Elektrondy densaýlyq tólqujatymen tanysqysy kelgen azamattyń ózi de elektrondy úkimet portalyna tirkelip, jeke paroli men logıni arqyly qujatty kóre alady. Osylaısha astanalyqtar 2019 jyldan bastap qaǵaz medısınalyq kartadan birtindep bas tartatyn bolady. «Paıdalanýshylardyń elektrondy densaýlyq pasportyndaǵy derbes derekteri pasıenttiń jeke kabıneti arqyly uıymdastyrylady. Medısınalyq ortaq derekqor retinde jasaqtalǵan júıege dárigerler naýqastyń jeke kýáligindegi JSN arqyly kirip, onyń syrqatnamasymen tanysa alady. Bul densaýlyq saqtaý salasynyń sapasyn arttyryp qana qoımaı, dárigerlerdiń de jumysyn jeńildetedi. Azamattar da qaǵaz kartochkasyn arqalap júrmeıdi. Olar týraly derekter senimdi ári qaýipsiz saqtalatyn bolady», deıdi basqarma basshysy.
Sondaı-aq jıynda astanalyqtardyń dárigerlerge onlaın rejimde jazylýy, halyqqa arnalǵan medısınalyq uıaly qosymshalardyń paıda bolýy da sóz boldy. Keleshekte árbir elordalyqtyń uıaly telefonyna densaýlyǵyn qorǵaý, salamatty ómir saltyn saqtaýǵa qatysty habarlandyrýlar, eskertýler joldanyp, jurtshylyqqa paıdaly jaqsy jańalyqtardan habardar etilmek.
Buǵan qosa, elordada 2025 jylǵa qaraı birneshe emhana ashylatyny da belgili boldy. Sonyń ishinde halyq kóp shoǵyrlanǵan Jaǵalaý, Aınakól, «Máńgilik el» qaqpasy aýdandarynda jańa medısınalyq uıymdar boı kóteredi. K.Nadyrovtyń aıtýynsha, emhanalar salý mindeti memleket-jekemenshik áriptestigi aıasynda ınvestorlarǵa usynylmaq. Qazir «Máńgilik el» qaqpasy aýdanynda emhana salýǵa nıet bildirgen ınvestor bar. Ekijaqty kelisimderden keıin qurylys quny anyqtalmaq. Sonymen qatar Astanada memleket-jekemenshik áriptestigi aıasynda hospıs salý da josparlanyp otyr. Qazirgi kúni nysannyń tujyrymdamasy ázirlený ústinde. Jańa ǵımarat «Kóktal» turǵyn alabynda boı kóteredi.
Qymbat TOQTAMURAT, «Egemen Qazaqstan»