Prezıdent Nursultan Nazarbaevtyń tóraǵalyǵymen ótken Úkimet otyrysynda Premer-Mınıstr Baqytjan Saǵyntaev baıandama jasap, Joldaýdyń qalaı oryndalyp jatqanyn aıtty.
«Úkimet Sizdiń bastamańyzben bastaý alǵan «Sıfrlyq Qazaqstan» baǵdarlamasyn júzege asyrý boıynsha belsendi jumystardy atqarýda. 2022 jylǵa qaraı elimizdiń barlyq eldi mekenderi keń jolaqty Internetke qol jetkizip, qajetti baılanyspen qamtamasyz etiledi», - dedi B.Saǵyntaev.
Sonymen qatar ol sıfrlyq ekonomıka men halyqtyń sıfrlyq saýattylyǵy úshin kadrlardy daıarlaý jónindegi jospar qabyldanǵanyn atap ótti. «Bastapqy 500 ónerkásiptik kásiporynda 4.0 Indýstrııasy elementterin engizý men bazalyq salalarda tehnologııalyq qaıta jaraqtaý boıynsha sharalar ázirlendi. Elektrondyq kommersııany damytýda, sondaı-aq jalpy IT-salany jetildirý turǵysynda zańnamalyq normalar ázirlendi. «Aqyldy» qalalardy damytý tujyrymdamasy bekitildi. Jyl sońyna deıin ár óńirde qanatqaqty jobalar júzege asyrylady», - dedi Premer- Mınıstr.
Nursultan Nazarbaev Premer-Mınıstrden «Sońǵy Joldaýdy oryndaý boıynsha ne istedińder?» - dep surady.
«Sońǵy Joldaý nátıjesi boıynsha Úkimette jalpy ulttyq baǵdarlama qabyldandy. Sala-sala boıynsha kórsetilgen 10 mindetke sáıkes ár mınıstrlikke tapsyrmalar berildi. Indıkatorlar qoıyldy. Jyldyń sońyna deıin tapsyrmalar oryndalatyn bolady», - dep jaýap berdi Baqytjan Saǵyntaev.
Memleket basshysy premer-mınıstrdiń baıandamasyna «Jaqsy baıandadyń, biraq ózińe degen synı kózqaras joq» dep baǵa berdi.