Úkimet otyrysynda Memleket basshysy Nursultan Nazarbaev sıfrlandyrý máselelerin xalyqqa keńinen túsindirýdi júktedi.
«Dáýren Áskerbekuly (Aqparat jáne kommýnıkasııalar mınıstri - avt.), teledıdarda, ortalyq jáne oblystyq gazetterde sıfrlandyrý boıynsha arnaıy aıdarlardy ashý qajet. Sıfrlandyrýdyń nátıjesi qandaı? Ne istedik? Qandaı jobany iske asyrdyq? Jalpy, sıfrlandyrý degenimiz ne? Bylaısha aıtqanda, bizge jappaı oqytý sharalaryn qolǵa alý qajet pe?», - dedi N.Nazarbaev.
Prezıdenttiń aıtýynsha, sıfrlandyrý máselesin mektep qabyrǵasynan bastap keńinen túsindirý kerek. Sebebi qazirgi jastar bolashaqta osy jumyspen tyǵyz aınalysady. «Bolashaqta olardyń barlyǵy osy salada jumys isteıdi. 2030 jylda múldem basqa ekonomıka bolady. Soǵan daıyn bolýymyz qajet. Qazir bilim salasyn ylǵı synaıdy. Reformalar kóp deıdi. Biraq basqa amalymyz joq. Balalar ózdigimen oılap, sheshim qabyldaýǵa úırenýi kerek. Bárin jattap alyp, emtıxan tapsyra salý - ol keshegi zamannyń talaby. Sondyqtan qazirgi sıfrlandyrýdy keńinen túsindirýimiz ári úıretýimiz kerek», - dep atap kórsetti Prezıdent.
Sonymen qatar Nursultan Nazarbaev blokcheın tehnologııalaryn qoldana otyryp, qosylǵan qun salyǵyn jınaý aqparattyq júıesiniń mańyzdylyǵyn atap ótti.
«Astana-1» óte mańyzdy. Jarty saǵat ýaqytty 5 mınýtqa deıin qysqartý - bul EDYU-dan (Ekonomıkalyq damý jáne yntymaqtastyq uıymy - avt.) da myqty kórsetkish. Blokcheın tehnologııasyn naqty osy baǵytta qoldaný kerek. Baqylaý aıqyn bolýy tıis. Salyqtyń jınalýyn 15-ten 25 paıyzǵa jaqsartý - bul Qarjy mınıstrligi úshin óte mańyzdy», - dedi Elbasy.
Qarjy mınıstri Baqyt Sultanovtyń atap ótýinshe, osy jyldyń tamyz aıynda blokcheın tehnologııalaryn qoldana otyryp, qosylǵan qun salyǵyn jınaý baǵytynda jańa aqparattyq júıeniń prototıpin tanystyrý kózdelip otyr. «Búkilálemdik bankpen birlesip, taýarǵa baqylaý jasaý boıynsha aqparattyq júıe jasalǵaly jatyr», - dedi mınıstr. Qarjy mınıstriniń keltirgen aqparatyna súıensek, ótken jyly JIО́-ge qatysty salyq túsiminiń azaıý trendi toqtatylyp, kórsetkish jaqsara túsken.
Sondaı-aq jıyn barysynda Nursultan Nazarbaev Premer-Mınıstrdiń orynbasary Erbolat Dosaev pen Qarjy mınıstri Baqyt Sultanovqa atalǵan baǵyttaǵy jumystardy baqylaýǵa alýdy júktedi.
«Memlekettik qaryzdy bir deńgeıde ustaý kerek. Osy baǵyttaǵy jaǵdaıǵa qadaǵalap otyrýyń kerek. Qaryzdy ulǵaıtpaı, kerisinshe ony kemitýdiń qadamdaryn Úkimetiń tabysymen oraılastyryp otyrý qajet. Ártúrli jaǵdaılar bolady, sondyqtan qajetti múmkindikter bolýy kerek. Keıingi kezde qurylysqa, joldarǵa biraz kóbirek alyp jiberdik», - dedi Prezıdent.
Esterińizge sala ketsek, búgin Qazaqstan Prezıdenti Nursultan Nazarbaevtyń tóraǵalymen el Úkimetiniń keńeıtilgen májilisi ótip jatyr. Otyrys barysynda Úkimet basshysynyń, birqatar mınıstrlerdiń, oblys ákimderiniń baıandamalary tyńdaldy.