Qazaqstan Prezıdenti Nursultan Nazarbaev elimizdegi qylmystyq prosesterdiń artyq jazalaıtyn tustaryn tómendetýdi tapsyrdy.
Úkimettiń keńeıtilgen otyrysyna qatysqan Memleket basshysy zańnyń ústemdigi men sybaılas jemqorlyqqa qarsy kúres kún tártibinen túspeıtinin atap ótti. Bul baǵytta Nursultan Nazarbaev aıtyp ótkendeı, az jumys júrgizilmegen.
«Quqyq qorǵaý qurylymdarynyń jumysy úshin barlyq jaǵdaı jasaldy, aılyqtary kóterildi. Alaıda quqyq qorǵaý organdaryna degen qoǵamnyń senimi áli de tómendeý deıtindeı sebepter bar. Osyǵan baılanysty qylmystyq prosesterdiń artyq jazalaıtyn tustaryn tómendetý men ony gýmanızmge qaraı baǵyttaý baǵdaryn jalǵastyra berý kerek. Sizder ózderińiz Batysta qylmystyq isterdiń 80-90 paıyzy beıbit jolmen sheshiletinin aıtasyzdar. Bizge nege olaı etpeske? Bizde áıteýir mindetti túrde ustap alyp, qamaý kerek. Al máseleni basqa da jolmen sheshýge bolatyn edi ǵoı», - dedi Nursultan Nazarbaev.
Prezıdent óz sózinde quqyq qorǵaý men sot organdarynyń kadrlyq quramyna qatań talaptar qoıylyp kelgenin atap ótti. Aldaǵy ýaqytta talap qoıý jalǵasa bermek. «Olardyń jumysy sondaı. Olardyń abyroıy, moraldyq-ádeptilik kelbeti minsiz bolýy kerek. Sybaılas jemqorlyqqa qarsy tabandy kúresti jalǵastyrýǵa tıispiz», - dedi Memleket basshysy.
Sondaı-aq Elbasy Nursultan Nazarbaev sońǵy kezde laýazym ıeleri tergelip jatqan qylmystyq isterge qatysty pikir bildirdi.
«Tek sońǵy eki jylda qylmystyq jaýapkershilikke 2 200 laýazym ıeleri tartylǵan. Olardyń arasynda mınıstrler, barlyq deńgeıdegi ákimder, vedomstvo basshylary bar. Qazirgi kezde sotta Ulttyq ekonomıka mınıstrliginiń eks-basshysyna qatysty qylmystyq is qaralyp jatyr. Shynyn aıtsam, Qýandyq Bıshimbaevqa aıanyshpen qaraımyn. Ony «Bolashaqpen» oqytyp, úmit arttyq. Árıne, ókinishti. Bilikti mamandy daıarlaýǵa qyrýar ýaqytty, qarjyny jumsaımyz»,- dedi Elbasy. Sonymen qatar Prezıdent Investısııalar jáne damý mınıstrligi Geologııa komıtetiniń tóraǵasyna, Densaýlyq saqtaý mınıstrligi Farmasııa komıtetiniń tóraǵasyna qatysty sotqa deıingi tergeý júrip jatqanyn eske salyp ótti «Farmasııanyń respýblıkalyq qurylymy osy jyldar boıy farmasevtıkalyq kásiporyndardyń qurylysyna jol bermeı kelgen», -dedi N. Nazarbaev.