Ońtústik Koreıanyń Phenchhan qalasynda HHIII qysqy Olımpıada oıyndary resmı túrde ashyldy
Dúnıejúziniń nazary búgin Azııanyń shyǵysy - Ońtústik Koreıa eline aýyp otyr. HHIII Qysqy Olımpıada oıyndaryn ótkizý 2018 jyly osy eldiń enshisine buıyrdy. Jalpy, biregeı sporttyq sharanyń ashylý saltanaty sportshylardyń sherýmen júrip ótýi, resmı ókilderdiń sóz sóıleýi - bárin qosqanda shamamen 2 saǵatqa sozylady. Uıymdastyrýshylar buǵan deıin habarlaǵandaı, atalǵan merekeniń daıarlyq jumysyna 300-ge jýyq adam qatysady. Al ashylý saltanatynyń arnaıy qoıylymyna 2 myńǵa jýyq akter atsalyspaq.
Sharadaǵy biz úshin aıtýly oqıǵalardyń biri - sportshylardyń sherýi. Qazaqstannyń kók Týy bizdiń delegasııany bastap shyǵatyn short-trekshi Abzal Ájiǵalıevtyń qolynda bolady. Aıta ketsek, Olımpıadaǵa Qazaqstannan 49 sportshy 57 joldama jeńip alǵan bolatyn. Olar sporttyń 9 túrinen synǵa túsedi. Olımpıadada jalpy 15 sport túrinen 102 medal jıyntyǵy sarapqa salynady. Atap aıtqanda, bıatlonnan - 11, bobsleıden - 3, skeletonnan - 2, kıorlıngten - 3, konkımen júgirýden - 14, mánerlep syrǵanaý - 5, short-trek - 8, taý shańǵysy - 11, shańǵy qossaıysynan - 3, shańǵy jarysy - 12, shańǵymen tramplınnen sekirýden - 4, frıstaıl - 10, snoýbord - 10, shana sporty - 4, shaıbaly hokkeıden - 2 medal oınatylady.
Eske sala ketsek, Phıonchhan Olımpıadasynyń ashylý rásimin tikeleı efırden Habar, Qazaqstan men Qazsport telearnalary kórsetedi.