Koreı Halyq Demokratııalyq Respýblıkasynyń (KHDR) basshysy Kım Chen Yn Ońtústik Koreıa prezıdenti Mýn Chje Indi Phenıanǵa shaqyrdy. Onyń sálemin qaryndasy Kım E Chjon jetkizdi. Kım E Chjon soltústikkoreıalyq kóshbasshylar otbasynyń arasynan alǵash ret Seýl qalasyna baryp otyr.
Kım E Chjon soltústikkoreıalyq delegasııa quramynda Ońtústik Koreıa ókilderimen joǵary deńgeıli kezdesý ótkizdi. Yonhap agenttiginiń habarlaýynsha ol aǵasynyń shaqyrýyn aýyzsha jetkizgen. Kezdesý Kók úı atalyp ketken prezıdent saraıynda ótti. Ońtústik prezıdenti Mýn Chje In men Kım E Chjon bir-birine jyly lebizderin bildirdi. Soltústik aımaqtyń quramynda KHDR-dyń resmı basshysy – eldiń joǵary jınalysynyń prezıdıýmynyń tóraǵasy Kım Iýn Nam da boldy.
Bul 1950 jyly eki memleket arasyndaǵy soǵystan bergi alǵash ret Seýlde ótken joǵary deńgeıli kezdesý bolyp otyr. О́tken ǵasyrdaǵy shıelenisten keıin KHDR-dy basqarǵan otbasylar quramynan Seýlge eshkim barmaǵan. Al Ońtústik Koreıa prezıdentteri Phenıanda eki márte bolypty.
Mundaı joǵary deńgeıli kezdesý Ońtústik Koreıanyń Phenchhan qalasynda ótip jatqan Olımpıadanyń arqasynda uıymdastyryldy. Aıta keterligi, eki Koreı eliniń sportshylary Olımpıadanyń ashylý saltanatynda bir týdyń, bir ánurannyń astynda shyqty.
Yonhap agenttigi Mýn Chje Inniń Phenıanǵa barýy koreı halyqtary arasyndaǵy úshinshi sammıt bolýy múmkin ekenin habarlady. Alǵash ret Phenıanǵa 2000 jyly Ońtústik Koreıanyń sol kezdegi prezıdenti Kım De Chjýn jol salsa, ekinshi ret 2007 jyly kezekti prezıdenti No Mý Hen barǵan.
Ońtústik Koreıanyń qazirgi prezıdenti Mýn Chje In ótken jyly saılaýda jeńiske jetken. Osy saılaýdyń aldynda ol Soltústik Koreıamen baılanysty retteý maqsaty basty nazarda bolatynyn málimdegen. Alaıda, Koreı túbegindegi jaǵdaı kún ótken saıyn ýshyǵa berdi. Oǵan Kım Chen Ynnyń bastaýymen birneshe ret ballıstıkalyq raketalardy synaqtan ótkizýi jáne AQSh prezıdenti Donald Tramppen kıkiljińge barýy sebep boldy.
Kım Chen Ynnyń qaryndasy birer kún buryn ótken Olımpıadanyń ashylýyna qatysty. Dál osy jıynǵa AQSh-tyń vıse-prezıdenti Maıkl Penstiń de qatysqany belgili boldy (fotoda). Biraq ekeýińniń arasynda eshqandaı kelissóz bolǵan joq. Al ashylý saltanatynan keıin soltústikkoreıalyq delegasııa Kók úıge shaqyryldy.
Kım E Chen aǵasy Kım Chen Ynnyń senimdi qyzmetkerleriniń biri bolyp esepteledi. О́tken jyly KHDR kóshbasshysy 30 jastaǵy qaryndasyn Eńbek partııasy Saıası bıýrosynyń múshesi etip taǵaıyndaǵan. Kım E Chen KHDR-daǵy adam quqyqtarynyń buzylýyna qatysy bar degen aıyppen AQSh-tyń sanksııalar tizimine engizilgen.
Daıyndaǵan
Aıan ÁBDÝÁLI, «Egemen Qazaqstan»