Shymkent qalalyq jedel medısınalyq kómek kórsetý aýrýhanasynda alǵash ret búırek almastyrý otasy shetel azamatyna jasaldy.
Medısınalyq týrızmdi damytý maqsatynda, Ońtústik Qazaqstan oblysy ákimdigi men densaýlyq saqtaý basqarmasynyń qoldaýymen sátti ótken ota nátıjesinde donor aýrýhanadan shyǵarylyp, ambýlatorlyq emdeýge joldanǵan. Al, resıpıent, ıaǵnı, kúrdeli ota jasalǵan shetel azamaty stasıonarlyq em qabyldaýda. Germanııa azamaty men onyń donory bolǵan Ýkraına azamatyna otany shymkenttik transplantolog-dárigerler jasady. Negizinde Shymkent qalalyq jedel medısınalyq kómek kórsetý aýrýhanasynda barlyq jaǵdaılar jasalǵan. Sheteldik naýqastar úshin ota jasaýdyń barlyq qolaıly jaǵdaılary qaralǵan, onyń ishinde biregeı preparattardyń qory jasaqtalǵan jáne servıstik palatalar bar, baǵalary da qoljetimdi. Dárigerlerdiń aıtýynsha, 50 jastaǵy shetel azamatyn ota baǵasynyń tym arzandyǵy qyzyqtyrǵan. Ol 4,5 mln teńge. Al Eýropa men AQSh-ta búırek transplantasııasynyń ortasha quny shamamen 60-70 myń dollar shamasynda eken.
Aıta ketelik, qazirgi tańda oblys boıynsha búırek jetispeýshiliginen zardap shegetin 600-den astam naýqas bar, olardyń barlyǵyna tolyqqandy em-dom kórsetilgenimen, búırek aýystyrýǵa muqtaj. 2013 jyldan beri Shymkent qalalyq jedel medısınalyq kómek kórsetý aýrýhanasynyń bazasynda 100-ge jýyq búırek almastyrý otalary jasalǵan. OQO densaýlyq saqtaý basqarmasynyń basshysy M.Egizbaevtyń aıtýynsha, Rýmynııa jáne Bolgarııa azamaty shymkenttik dárigerlerdiń aǵza almastyrý otasyn jasaǵanyn qalap otyr. Naýqastar ózderimen birge donor da alyp kelmek.
Ǵalymjan ELShIBAI, «Egemen Qazaqstan»