Qazaqstannyń Ulttyq ekonomıka mınıstrliginiń basshylary Ortalyq kommýnıkasııalar qyzmetinde ótken baspasóz máslıhatynda elimizdiń 2017 jylǵy áleýmettik-ekonomıkalyq damýyna qorytyndy jasap, sondaı-aq mınıstrliktiń aǵymdaǵy jylǵy josparyn belgiledi.
Ulttyq ekonomıka birinshi vıse-mınıstri Rýslan Dálenov óziniń baıandamasynda Qazaqstannyń IJО́-si 2017 jylǵy qorytyndy boıynsha 4 paıyzdy quraǵandyǵyn eske saldy. Onyń aıtýynsha, 2017 jylǵy basty ekonomıkalyq qorytyndyny myna sebepter boıynsha sapaly dep ataýǵa bolady.
«О́simniń úshten ekisi óńdeýshi emes salalar arqyly qamtamasyz etildi, barlyq ishki salada derlik ósim oryn aldy (2016 jylǵy 22 salaǵa qaraǵanda 2017 jyly 31 salada oń ósim boldy), óńdeý ónerkásibinde besjyldyq joǵary ósim tirkeldi (2017 jyly óńdeý ósimi 5,1 paıyz), qalaýly dep atalatyn salalarda eleýli ósim bar (máselen, farmasevtıka 41,8 paıyzǵa ósken), shıkizatsyz eksport pen tereńdeı óńdeletin taýarlarynyń ulǵaıýy baıqalady. 2017 jylǵy el ekonomıkasynyń sapaly ósimge jetýine «Nurly jer» baǵdarlamasyn júzege asyrý óz úlesin qosyp otyr, sonyń arqasynda rekordtyq 11,2 mln sharshy metr turǵyn úı iske qosyldy. «Nurly jol» baǵdarlamasynyń aıasynda 4 myń shaqyrym jol qaıta quryldy, sondaı-aq eldi Indýstrııalandyrý kartasy boıynsha 120 joba paıdalanýǵa engizildi. Qabyldanǵan eksporttyq strategııasynyń aıasynda elimizdegi 400 eksporttaýshyǵa qoldaý kórsetildi, 192 myń bıznes sýbektisi «Bıznestiń jol kartasy-2020» baǵdarlamasy aıasynda qoldaýǵa ıe boldy», dedi R.Dálenov.
Birinshi vıse-mınıstr 2018 jylǵy mınıstrlik mindetteriniń qatarynda elimizdiń makroekonomıkalyq turaqtylyǵyn qamtamasyz etýdi, bıýdjetaralyq qatynastardy jetildirýdi, salyq saıasatyn nyǵaıtýdy, memleket-jekemenshik áriptestigi quraldary men ádisterin keńeıtýdi, eldiń bereshekterin tıimdi basqarýdy atady.
Ulttyq ekonomıka vıse-mınıstri Baýyrjan Bekeshev óz baıandamasynda 2017 jyly barlyq mańyzdy kórsetkishter boıynsha syrtqy saýdada oń dınamıka baıqalǵandyǵyn atap kórsetti.
«Biz 2016 jylmen salystyrǵanda syrtqy saýda aınalymynda 25,1 paıyzdy quraıtyn edáýir ósimdi baıqap otyrmyz. 2017 jylǵy aqshalaı mándegi kórsetkish 69,5 mlrd AQSh dollaryn qurady (2016 jyly uqsas kórsetkish 55,5 mlrd AQSh dollaryna teń boldy)», dedi B.Bekeshev.
Ol ótken 2017 jyly syrtqy saýda qurylymy aıtarlyqtaı ózgergendigin atap kórsetti.
«Shıkizatsyz ónim úlesiniń ósimi baıqalady, eksporttyń qurylymynda jańa taýarlyq qaǵıdalar paıda bolýda. Máselen, Qazaqstan eksportynyń jalpy kólemi 31,6 paıyzǵa ósti jáne 43,1 mlrd AQSh dollaryn qurady (2016 jyly 32,7 mlrd AQSh dollary). Shıkizatsyz taýarlardyń úlesi aıtarlyqtaı ulǵaıdy, bul kórsetkish boıynsha ósim 22,1 paıyzdy qurady», dedi ol.
Vıse-mınıstr Aıbatyr Jumaǵulov mınıstrliktiń jergilikti ózin-ózi basqarýdy damytý jónindegi jumystary týraly baıandap, 2017 jyly qabyldanǵan jergilikti ózin-ózi basqarýdy damytý máseleleri jónindegi zańǵa sáıkes JО́B bıýdjeti men kommýnaldyq menshigi 2018 jylǵy 1 qańtardan bastap halyq sany 2 myńnan asatyn aýyldyq okrýgterde, al 2020 jylǵy 1 qańtardan bastap barlyq jerlerde engiziletinin tilge tıek etti.
Raýan QAIDAR, «Egemen Qazaqstan»