Qazaqstan Respýblıkasy Memlekettik ortalyq mýzeıi Almaty qalasyndaǵy Gete ınstıtýtymen birlesip uıymdastyrǵan «Ekologııalyq sana – tabıǵattan úırenemiz» atty halyqaralyq ınteraktıvti kórme ashyldy. Bile bilseńiz bul kórmede Jer, Ot, Aýa jáne Sý sekildi ǵajaıyptardyń jaratylysyn tanýǵa múmkindik alasyz.
«Ekologııalyq sana – tabıǵattan úırenemiz» kórmesi bizdiń planetamyz týraly kóptegen qyzyqty nárselerdi baıandaıdy jáne Jer, Ot, Aýa jáne Sý degen tórt qudirettiń qasıetteri men erekshelikterine arnalady. Bul kórmede tek tańǵajaıyp derekter men dáıekter ǵana emes, adamnyń tabıǵatpen ózara árekettesýiniń oń jáne teris aspektilerin sýretteı otyryp, qorshaǵan ortany saqtaýǵa qatysýǵa shaqyrady.
Birinshi «Jer» tarmaǵynda kórmege kelýshiler Jer betindegi halyqtardyń ornalasýy, onyń lastaný faktilerin, resýrstaryn, klımattyń ózgerýine áser etetin faktorlardy, tabıǵı resýrstardy saqtaý jáne jańa tehnologııalardy paıdalanýdyń joldary týraly biletin bolady.
Ekinshi «О́rt» tarmaǵynyń ekspozısııasy boıynsha kún energııasy, janartaýlar, órtter, «passıvti» úı, bolashaqtyń úıi jáne gelıotropty úı, kún shuǵylaly joldarmen jáne OLE robot-qońyzben (jol talǵamaıtyn órt sóndirý qondyrǵysy) tanysýǵa múmkindik alady.
Úshinshi «Aýa» taraýy – atmosfera, aýanyń lastanýy, parnıktik áser, jel elektr qondyrǵylary, elektromobılder, aerodınamıka men bıonıka jaıynda baıan etedi.
Tórtinshi «Sý» taraýynyń taqyryptyq fotosýretteri men stendteri álem boıynsha qansha sý bar; sý sapasyn jaqsartý joldary; sý resýrstaryn paıdalaný; jańa tehnologııalardy qalaı qoldanýǵa bolady; sýdyń lastanýynyń qalaı aldyn alýǵa bolady degen suraqtarǵa jaýap beredi.
«Ekologııalyq sana – tabıǵattan úırenemiz» kórmesi ekologııa máselelerimen aınalysatyndarǵa ǵana emes, sondaı-aq qorshaǵan orta problemalaryna beıjaı qaramaıtyn adamdarǵa, sondaı-aq, kórme qazaq jáne orys, nemis tilderinde usynylǵandyqtan nemis tilin úırenýshilerge de qyzyqty ári paıdaly bolmaq.
Kórmeni tamashalaıtyn árbir adam qorshaǵan ortany qorǵaý isine qalaı jeke úles qosa alatyndyǵyn túsinýge múmkindik ashady dep bilemiz.Tórt qudiret týraly tanymyńyz da ózgerip sala beredi. Tańǵajaıyp tórt qudiret… Jer… Ot… Aýa… Sý…
Saparbaı PARMANQUL,
«Egemen Qazaqstan»
ALMATY