Memleket basshysynyń halyqqa Joldaýy – qazaqstandyqtar jyl saıyn asyǵa kútetin mańyzdy qujat. Elbasy atap ótkendeı, «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty bul Joldaý jańa álemge, ıaǵnı tórtinshi ónerkásiptik revolıýsııa keńistigine beıimdelý men jetistikke jetý jolyn tabý úshin ne isteý qajettigin aıqyndaıdy.
Qazaqstanda tabysty jumys istep kele jatqan naryqtyq ekonomıka modeli qalyptasqan. «100 naqty qadam» Ult jospary, negizinen uzaq merzimge arnalǵan jáne josparly túrde iske asyrylýda. Bizdiń uzaq merzimdi maqsattarymyz ózgerissiz qala beredi. Qazaqstan álemdegi túrli synaqtarǵa tótep berip, qarqyndy ekonomıkalyq damý jolyna bet alǵan. Osyny basa aıtqan Elbasy aldaǵy on mindetti atap ótti. Onyń ishinde áleýmettik salaǵa da jiti kóńil bólindi. Ulttyń áleýetin arttyrý úshin mádenıetimiz ben ıdeologııamyzdy odan ári damytý qajettigin, óziniń tarıhyn, tilin, mádenıetin biletin, sondaı-aq zamanyna laıyq, shet tilderin meńgergen, ozyq ári jahandyq kózqarasy bar qazaqstandyq bizdiń qoǵamymyzdyń ıdealyna aınalýyna tıis ekendigin atap ótti.
Qazirgi densaýlyq saqtaý isi negizinen aýrýdyń aldyn alýǵa baǵyttalǵan. Salamatty ómir saltyn nasıhattaý jumystary ári qaraı jalǵasady. Halyqtyń ómir súrý uzaqtyǵyn arttyrý úshin medısınalyq qyzmet kórsetýge degen suranys arta túsetinine aýdannyń medısına qyzmetkerleri túsinistikpen qaraýda.
Ol úshin medısına qyzmetkerlerdiń kásibı bilim deńgeıin arttyrý jumystary jalǵasyn tabady, sapasyna kóńil bólinedi.
Onkologııalyq aýrýlarmen kúresý úshin bes jyldan beri skrınıngtik tekserý sharalary júrgizilýde. Aýdanymyzda onkologııalyq aýrýlardy erte anyqtaý jumystary belsendi júrgizilýde, jyldan-jylǵa qaterli syrqattyń asqynǵan túri azaıýda.
Aýdan boıynsha materıaldyq-tehnıkalyq baza nyǵaıtylýda: alty eldi mekende tıptik úlgidegi dárigerlik ambýlatorııalar paıdalanýǵa berildi. 2017 jyly 108 mıllıon teńgege asa qajetti medısınalyq qural-jabdyqtar satyp alyndy. Densaýlyq saqtaý salasy halyqtyń, memlekettiń jáne jumys berýshiniń ortaq jaýapkershiligine negizdelgen, osyǵan oraı aýdan boıynsha mindetti áleýmettik medısınalyq saqtandyrý júıesin engizýge tolyqqandy daıyndyq jumystary júrgizildi.
Joldaýda aqparattyq júıelerdi biriktirý, mobıldik sıfrly qosymshalardy qoldaný, elektrondy densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medısınalyq kómektiń qoljetimdiligi men tıimdiligin arttyrý qajettigi atap ótildi. Búgingi tańda Shet aýdandyq ortalyq aýrýhanasy men dárigerlik ambýlatorııalarda sıfrly aqparattyq júıeler qoldanysqa engizilýde. Aýrýlarǵa kórsetiletin dárigerlik qyzmet keshendi medısınalyq-aqparattyq júıemen atqarylýda jáne bul júıe arqyly emhana dárigerleri oblys kólemindegi joǵary deńgeıli aýrýhanalarmen tyǵyz baılanysta. Dıagnozdy naqtylaýǵa joǵary deńgeıdegi klınıkalarǵa kez kelgen qajetti jaǵdaıda jiberýge múmkindik jasalǵan. Elektrondy densaýlyq pasportyn engizý, eki mobıldik sıfrly qosymshalar jumysy atqarylýda. Medısınalyq kadrlarmen qamtamasyz etý máselesi aýdan ákiminiń qoldaýymen aýdan boıynsha birtindep óz sheshimin taýyp keledi. О́tken jyly aýrýhanamyz 12 dáriger mamanmen tolyqty, onyń altaýy – jas maman. Joǵary sanatty hırýrg maman kelýine oraı ota jasaýdyń ártúrli ádistemeleri engizilýde.
Elbasymyzdyń Joldaýy bolashaqtaǵy jolymyzdy aıqyndap berdi. Eń bastysy, osy Joldaýdy júzege asyrýdaǵy negizgi jetistigimiz halqymyzdyń ál-aýqatyn jaqsartý bolmaq. Qol jetkizgen tabystarǵa toqmeıilsýge bolmaıdy. Elbasy atap kórsetkendeı, Qazaqstan táýelsizdiginiń úshinshi onjyldyǵyna durys baǵytta qadam basý úshin bizge áli kóp jumys isteýge týra keledi.
Haýarıra ÁBITAEVA, oblystyq máslıhattyń depýtaty
Qaraǵandy oblysy, Shet aýdany