Qazir bas bilmeıtin asaýlardy úıretýdi bylaı qoıyp, atqa minetin adam kórsek qýanatyn jaǵdaıǵa jetip qalǵandaımyz. Búginginiń balalary taı úıretýge emes, uıaly telefon ishindegi sheteldiń qubyjyqtaryn kúıretýge qushtar ekendigin de eshkim joqqa shyǵara qoımas. Ne desek te, qazaqtyń qylquıryqtydan ajyrap bara jatqany ras. Kóńildiń osylaı kirbiń tartqan kezderinde ózderi at tóbelindeı az bolsa da babadan qalǵan baǵlan ónerimizdi nasıhattap, asaýlarmen alysyp, jelmen jarysqan qazaqtyń marqasqa jigitteri jaıynda aıta bergiń keledi. Asaýlarmen alysyp demekshi, shyn máninde júgen, quryq tımegen jylqylardy yrqyna baǵyndyryp, talaı dúbirli dodalarǵa qatysyp júrgen taqymy myqty shabandozdardyń biri Erasyl Dıqanbaev Úrjar aýdanynyń Qarabulaq aýylynda turady.
Erasyl 2016 jyly Astanada asaý úıretýden ótken «Astana juldyzy» respýblıkalyq týrnırinde kúmis júlde ıelense, byltyr Kókshetaýda jalaýy jelbiregen «Alashtyń altyn shańyraǵy» etnofestıvalinde asaý úıretýden el chempıony atanǵan-dy. Jaqynda Úrjar aýdanyna jol túskende asaýlardyń arynyn basqysh azamatpen az-kem áńgimelesýdiń sáti túsken. «Qazaqtyń has batyry Qabanbaı babamyzdyń 300 jyldyǵy toılanǵan kezde dúnıege kelgendikten esimimdi Erasyl dep qoıypty. О́zimniń týyp-ósken jerim aıdyndy Alakól bahadúr batyrdyń da kindik qany tamǵan mekeni. Sondaı topyraqta ónip-óskennen keıin atqumar bolmaý múmkin emes shyǵar. Asaý úıretýge aýdaryspaq arqyly keldim desem de bolady. Týǵan aǵam Qurmanǵazy aýdaryspaqtan aýdanǵa, oblysqa, respýblıkaǵa belgili azamat. Vengrııada ótken álem birinshiliginde chempıon atanǵan. Ákem de jylqyny jaqsy kóredi. Atqa degen qushtarlyq sol kisilerden daryǵan bolý kerek. Qazir respýblıkalyq jarystarǵa belgili atbegi, ustazym Táttimbet Kápulynyń qoldaýymen, baptaýymen qatysyp júrmin», deıdi shabandoz.
Erasyldyń byltyr Kókshetaýda ótken chempıonattaǵy asaý úıretken sáttegi kóz ilespes jyldamdyǵy, astyndaǵy asaý aǵash qorshaýǵa baryp soǵylǵan kezde asqan shapshańdyqpen ekinshi qaptalǵa ytqyp shyǵyp, qaıtadan qarǵyp minip alǵany saıysty tamashalaǵan eldiń delebesin qozdyra tústi. Alaıda Erasyl jurt kóńiline jaqqan mundaı tamasha kórinisterdiń ar jaǵynda qanshama qıyndyq pen tógilgen ter jatqanyn aıtady. «Sol sát áli esimde. Asaýdyń moınyna shalmany ózim tastadym.
Attyń tórt aıaǵy kókten kep omaqasa qulaǵanda minip úlgerdim. Turdy da qorshaýǵa tiginen shaýyp qabyrǵaǵa soǵyldy. Sol kezde saqtyq úshin ekinshi qaptalǵa sekirýge týra keldi. Qorshaýdan alystaǵannan keıin qaıta minip aldym. Menińshe, asaýǵa shalmany ózimniń salyp mingenim erekshe kórindi me dep oılaımyn. Tóreshiler meniń ónerimdi osy turǵydan baǵalaǵan sekildi», deıdi Erasyl. Onyń aıtýynsha, asaý úıretý jarystarynyń ózindik tártibi bar. Shabandozdyń óneri tek shalma salyp, asaýǵa minip, tas kenedeı jabysyp at ústinen túspeı qoıýmen ǵana baǵalanbaıdy. Asaýdy úıretý barysyndaǵy qamshy basyp, jylqynyń qytyǵyna tıip, kókke shapshytyp, týlatý sekildi qan qyzdyrar sátterge tóreshiler joǵary upaı beredi eken. Al osyndaı úlken týrnırlerge qatysar aldynda shabandozdar asaýǵa minip jattyǵýdan bólek, tynysyn ashý úshin kánigi sportshylardaı júgiretin kórinedi.
Azamat QASYM, «Egemen Qazaqstan»
Shyǵys Qazaqstan oblysy, Úrjar aýdany, Qarabulaq aýyly