Ortalyq kommýnıkasııalar qyzmetinde Qazaqstan Respýblıkasy Investısııalar jáne damý mınıstrliginiń alqa otyrysyna arnalǵan baspasóz konferensııa ótti.
Sharaǵa Investısııalar jáne damý birinishi vıse-mınıstri Roman Sklıar, Investısııalar jáne damý vıse-mınıstri Qaıyrbek О́skenbaev jáne Investısııalar jáne damý vıse-mınıstri Arystan Qabykenov qatysyp, Mınıstrliktiń 2017 jylǵa arnalǵan jumysynyń nátıjeleri týraly, Mınıstrliktiń 2018 jylǵa josparlary týraly baıandady.
Jýrnalısterdiń suraǵyna jaýap bergen Qaıyrbek О́skenbaev Byltyr «Nurly jer» baǵdarlamasy qosylǵanyn tilge tıek etip, Úkimetke daıyndalyp jatqan usynysqa da toqtalyp ótti.
«Byltyr «Nurly jer» baǵdarlamasy iske qosqanda ıpotekanyń paıyzy 10 paıyzdan aspaý kerek dedik. Odan asatyn bolsa, úkimet óz tarapynan ony sýbsıdııalaý mehanızimin iske asyrdy. Qazirgi ýaqytta ol jumys jaqsy júrip kele jatyr. Ipotekanyń sany kóbeıýde. Sony eki jolmen arzandatamyz dep otyrmyz. Buryn jaı bankter bergen ıpoteka shamamen 80 paıyzdaı bolsa, 20 paıyzyn Turǵyn úı qurylys jınaq banki quraıtyn. Al byltyr Turǵyn úı qurylys jınaq bankiniń ıpotekasy 76 paıyzǵa deıin jetti. Qalǵan bankter 24 paıyzyn qurap otyr. Osy jolda eki maqsatty kózdep otyrmyz. Qalǵan bankterdiń osy jumysqa aqshalaryn jumsaý qandaı tetikteri bar ekenin sony alyp, ıpotekanyń baǵasyn túsirilse dep. Ondaı usynysty biz daıyndap otyrmyz. 10 paıyzdan da arzan bolsa eken dep. Eger Úkimet qoldasa ony jaqyn arada estıtin bolasyzdar. Ekinishden, jańaǵy Turǵyn úı qurylys jınaq bankiniń mehanızimin damytyp otyrmyz. Olardyń paıyzy ózderińiz bilesizder 5 paıyzdan bastap, 9,5 paıyzǵa deıin», dedi Q.О́skenbaev.
Sonymen qatar ol Ipotekalyq úı alýǵa arnalǵan mindetti alǵashqy jarna 30 paıyzdan tómendemeıtinin jetkizdi.
«Sebebi ony azaıtatyn bolsaq, aılyq tóleıtin tólem ósip ketedi. Mysaly, 30 paıyzdy aldyn-ala tólep qoısańyz, onda aı saıyn 50 myńnan tólep otyrasyz. Eger 15 paıyzǵa deıin túsiretin bolsaq, aılyq tóleıtinińiz 75 myńǵa ósip ketedi. «Nurly jer» baǵdarlamasynyń júzege asýymen óńirlerdegi qurylystar da jaqsy júrip jatyr. Tek qana úı emes, kishi aýdandarda boı kóterip, bir jyldyń ishinde 25-30 úıden turǵyzylýda», dedi ol.
Raýan QAIDAR,
«Egemen Qazaqstan»