Aýǵan soǵysyna qatysqan atyraýlyqtardyń esimderi kitapqa engizildi. О́tken jyly 546 jaýyngerdiń ómirbaıany men estelikteri jazylǵan jınaq jaryq kórgen bolatyn.
Atyraý munaı jáne gaz ýnıversıtetiniń dosenti Aıgúl Ermekovanyń bastamasyn Jylyoı aýdanyndaǵy áriptesteri de qoldap, «Alysta qalǵan Aýǵanstan» atty jańa kitaptyń tusaýkeser rásimin ótkizdi.
15 aqpan – Keńes áskerleriniń Aýǵanstannan shyǵarylǵan kúni. Jyl saıyn osy mezgilde oblysta túrli sharalar uıymdastyrylady. Jylyoı aýdandyq mádenıet úıinde ótken keshke Mańǵystaý oblysy Beıneý aýdanynan Aýǵan soǵysy ardagerleri qoǵamynyń tóraǵasy Sándibek Úsenov, ardagerler Bısenbaı Demeýov, Nurbergen Jańbyrbaev, Maqat aýdandyq Aýǵan soǵysy ardagerleri qoǵamynyń tóraǵasy Qalybek Tájibaev, ardager Kenjebaı Taǵabergenov, Qyzylqoǵa aýdandyq ardagerler qoǵamynyń tóraǵasy Nurman Májekovter arnaıy kelip qatysty.
Atyraý oblysynan Aýǵanstanǵa attanǵan 13 jaýynger qaza tapty, bir jaýynger joǵalyp ketkender tiziminde tur. Olardyń taǵdyrlaryn órnekti sózben órip shyqqan kitaptyń avtory - QR Mádenıet qaıratkeri, aqyn, jýrnalıst Sáýlesh Shátenova. «Osy kitapty jazbaǵanda, Aýǵan soǵysy degenge múlde mán bermeı júre berer me edim? Qandy shaıqastyń barsha qasiretin, qıyndyǵyn jan júregimmen sezindim,-deıdi ol,- soǵysta opat bolǵan jylyoılyq jaýyngerler Bolat pen Erbolattyń taǵdyry, olardyń analarynyń qaıǵysy kózime jas úıirdi.
Nebári jıyrmaǵa da jetpeı qyrshyn ketken jastardyń jóndi ómirbaıandary da joq edi, sondyqtan olar týraly málimetter de az boldy. Aýǵandyq jaýyngerlerdiń erligin patrıottyq tárbıeniń negizi etip, mektepterdiń oqý baǵdarlamalaryna engizýdi usynamyn. Kitaptyń jaryq kórýine aýdandyq Aýǵan soǵysy qoǵamynyń tóraǵasy Dosan Ádilov zor eńbek sińirdi».
Baqytgúl BABASh,
«Egemen Qazaqstan».