Uly Qorqyt babanyń ónerin keıingi urpaqqa amanattaýda aıryqsha eńbek sińirgen áıgili qobyzshy Yqylas Dúkenuly ekeni daýsyz. Ǵasyrlar toǵysynda ómir súrgen qobyzshynyń dańqy búginde urpaqtar jadynda. Yqylas babamyzdan qalǵan jádigerlerdiń bári de qundy bolǵanymen, ásirese onyń saıyn dalanyń degdar bolmysyn boıyna tartqan qobyzynyń qudireti bir tóbe. Jalpy, Yqylas Dúkenuly jaıly derekter Sarysý óńirinde kóptep kezdesedi. Aýdannyń Baıqadam aýylyna kireberistegi kúıshiniń qurmetine qoıylǵan mazarynyń qobyz tektes kóshirmesi de aýyq-aýyq qobyz únin shyǵaryp turatynyn turǵyndardyń talaı ret aıtqany bar.
Búginde Jambyl oblystyq tarıhı-ólketaný mýzeıinde Yqylas Dúkenulynyń qobyzy saqtaýly tur. Tarıhı derekter boıynsha, bul qobyzdy kúıshi óz qolymen oıyp jasaǵan eken. Qobyzshynyń tirliginde aınymas serigi bolǵan bul aspapty áýeli kishi uly Aqynbaı men kelini Rázııa kózdiń qarashyǵyndaı saqtap kelipti. Keıinnen Aqynbaı dúnıe salǵan soń Rázııa áje bul qobyzdy ótken ǵasyrdyń sekseninshi jyldaryna deıin eshbir janǵa kórsetpepti. Bul kisi de ómiriniń sońynda kúıshi qobyzyn uly Dáýlet pen kelini Altynǵa amanattaıdy.
Mýzeı dırektory Gúlnur Emberdıeva bul qundy jádigerdi qorǵa Sarysý aýdany, Jaılaýkól aýylynyń turǵyny, qobyzshynyń shóbere kelini Altyn Aqynbaeva ótkizgenin aıtady. Al uly qobyzshynyń qolynda talaı ýaqyt boıy qazaq dalasyn kúımen terbetken qara qobyzdyń oqys jaǵdaıda dybys shyǵaratyn qasıeti de tylsymǵa toly. Búginde bul erekshe qobyz kúıshi urpaqtarynyń uqyptylyǵy arqasynda bir ǵana áýlettiń emes, tutas qazaqtyń qundy jádigerine aınalyp otyr. Qazaqtyń kúı ónerin, kóne aspaptardy zertteýshi mamandar úshin de, bolashaqta yqylastanýshy jastar úshin de bul taptyrmas olja.
Hamıt Esaman,
«Egemen Qazaqstan»
Jambyl oblysy