Qobyzshy Dınara Hasanova men dombyrashy Arman Aınabaev osydan on jyl buryn qurǵan «DıAr» dýeti bul kúnderi Arqa jurtyna jaqsy tanymal. Sahnaǵa alǵash Qurmanǵazynyń «Adaı» kúıimen shyǵyp, kóptiń kóńilin jaýlap alǵan juptyń repertýary búginde san alýan óner týyndylaryna baı.
Dınara – daryndy balalarǵa arnalǵan mamandandyrylǵan mýzyka mektebiniń túlegi. Mektepti prıma-qobyz klasy boıynsha támamdaǵan bette Qaraǵandy fılarmonııasynda sol kezde jańadan qurylǵan «Arqa sazy» folklorlyq ansambline qabyldandy. Sonymen qatar T.Júrgenov atyndaǵy Almaty óner akademııasynyń syrtqy bóliminde oqydy.
Bir jarym jyldan soń ansamblge Balqash mýzyka mektebiniń jáne Táttimbet atyndaǵy Qaraǵandy óner kolledjiniń túlegi Arman Aınabaev kelip qosyldy. Keıin Arman Taraz pedınstıtýtynda bilimin jetildirip, «Ansambl ártisi jáne dırıjer» mamandyǵyn alyp shyqty.
«DıAr» – dombyra men prıma-qobyzdy úılestirgen Qaraǵandy óńirindegi alǵashqy dýet. О́nerli juptyń repertýarynan úndi men túrik halyqtarynyń tanymal ánderi men mýzykalary, 70-shi, 80-shi jyldardyń hıt ánderi oryn alǵan. Bul shyǵarmalar qazaqtyń ulttyq aspaptarymen oryndalǵanda tyńdarmandy erekshe bir áserge bóleıdi.
Dýet búginde oblys ortalyǵynyń kóptegen sahnalarynda, oqý oryndary men balalar úıinde óner kórsetip júr. Gastroldik saparmen Qaraǵandy oblysynyń barlyq aýdan-qalalarynda, Astana, Pavlodar, Ekibastuz, Semeıde bolǵan.
Baıqara Sádýaqasov jetekshilik etetin «Arqa sazy» ansamblinde 2004 jyldan beri jumys istep kele jatqan Dınara men Arman ujymmen birge Fransııa, Germanııa, Túrkııa, Malaızııa, Kýveıt, Oman elderine baryp óner kórsetti.
Dýet qazirgi ýaqytta Kavkaz áýenderimen jumys isteýde. Tyńdarmandar men kórermenderdi jalyqtyryp almaý úshin repertýardy jańartyp otyrý – negizgi mindet.
Dınara Hasanova Qaraǵandydaǵy «Shalqyma» konsert zalynda jeke konsert berdi. Arman Aınabaev ta shyǵarmashylyq esep berý keshine daıarlyq ústinde. Daryndy jastar ónersúıer qaýymnyń kóńilinen shyǵýǵa árdaıym ázir.
Qaırat ÁBILDA,
«Egemen Qazaqstan»
QARAǴANDY