О́tken jyldyń shilde aıynda Ortalyq kommýnıkasııalar qyzmetinde Aqparat jáne kommýnıkasııalar mınıstri Dáýren Abaevtyń qatysýymen ótken kezekti jıynda, alys-jaqyn shetelderde ómir súrip jatqan qandastarymyzdyń ómir-tarıhymen tanystyratyn «Qıyrdaǵy qazaqtar» atty joba aıasynda kóp serııaly derekti fılm túsirý isi qolǵa alynatyny jaıly aıtylǵan bolatyn. Sodan beri jeti aıdyń júzi boldy.
Keshe joǵaryda jarııa etilgen jobanyń alǵashqy tusaýkeser rásimi ótti. Osy ýaqyt arasynda aıtarlyqtaı is atqarylǵan eken. Atap aıtqanda, jobany tııanaqtap saparǵa attanǵan top 30 myń shaqyrym joldy basyp ótip, Reseıdiń Astrahan, Mońǵolııanyń Ulan-batyr qalasy, О́zbekstannyń Tashkenttegi Kenımeh aýdany jáne Tájikstannyń Hýdjand shahary qatarly eldi mekenderde bolyp, tarıhı oryndardy kózimen kórip, sondaǵy qazaqtar ómiri men turmysyn taspaǵa túsirgen.
Sondaı-aq mańyzdy sharanyń kózdegen maqsaty týraly kópshilikti habardar etken mınıstr Dáýren Áskerbekulynyń aıtýyna qaraǵanda, bul joba Elbasynyń «Bolashaqqa baǵdar: rýhanı jańǵyrý» atty maqalasy aıasynda qolǵa alynyp otyr. Sebebi Qazaqstan qazirgi tańda álem boıynsha syrttaǵy qandastaryn atajurtyna tartýshy az ǵana elderdiń biri. Ekinshiden, Dúnıejúzi qazaqtarynyń quryltaıynda Memleket basshysy: «Syrttaǵy elim degen qazaqqa – Qazaqstannyń esigi árqashan ashyq» – dep atap ótkenindeı, mınıstrlik osy tapsyrmany oıdaǵydaı oryndaý úshin jáne syrttaǵy aǵaıynnyń ómirin atajurttaǵy turǵyndarǵa keńirek tanystyrý maqsatynda osy jobany qolǵa alyp otyr dedi.
Sheteldegi ár qazaqtyń júregi atameken – elim dep soǵatynyn aıtqan joba jetekshisi Oljas Berkinbaev Elbasymyz júrgizip otyrǵan kóp salaly saıasattyń arqasynda barǵan elderdiń bularǵa degen oń kózqarasy istiń sátti aıaqtalýyna kóp áser etkenin atap ótti.
«Qıyrdaǵy qazaqtar» derekti fılmder toptamasynyń bul jolǵy kórsetilimi – Mońǵolııa qazaqtaryna arnalypty. Iаǵnı eldiń astanasy Ulan-batyr qalasynda jáne oǵan jaqyn ornalasqan Nalaıhan aýylynda ǵumyr keship jatqan qazaqtardyń búgingi tirshiligi shynaıy baıandalǵan.
Derekti fılmnen túıgenimiz: Nalaıhan aýylynda dál qazir 800-den astam qazaq otbasy ómir súrip jatyr eken. Árıne bul baýyrlar ata saltymyzdy jaqsy saqtaǵan. Aýyldyń ereksheligi – bul jerde kúlli eldi kómirmen qamdap turǵan shahta ornalasqan. О́tken ǵasyrdyń 30-jyldary osy shahta qazaqtardyń kúshimen ashylǵan. Sodan beri kenishte ter tókken 10 qazaq azamaty sol eldiń Eńbek Eri ataǵyn alǵan.
Sonymen qatar fılmde eldiń ortalyǵy Ulan-batyr qalasynda kásibin dóńgeletip otyrǵan bıznesmender, jańa IT tehnologııasyn ıgergen, tipti Kembrıjde bilim alǵan jas maman, sol eldiń saıası strategııasyn negizdeýshi zertteý ınstıtýtyn basqaryp otyrǵan qandasymyz qatarly kóptegen tulǵalardyń ómir-tarıhymen tanysýǵa múmkindik bar. Qalǵan serııalar aldaǵy kúnderi ret-retimen ekran arqyly kópshilik nazaryna usynylady. Tusaýkeser rásimge memleket jáne qoǵam qaıratkerleri, Parlament depýtattary, BAQ basshylary, ǵalymdar, tarıhshylar, bloger-jýrnalıster qatysty.
Beken QAIRATULY, «Egemen Qazaqstan»