«Qazaqstan» ulttyq arnasy – qazaq teledıdarynyń qara shańyraǵy. Televızııa salasyndaǵy ulttyq brend. 2011 jyldan bastap Elbasy N.Nazarbaevtyń tapsyrmasymen memleketimizdiń aqparat saıasatyn júzege asyratyn «Qazaqstan» ulttyq arnasy júz paıyz qazaq tilinde habar tarata bastady.
«Qazaqstan» RTRK Basqarma tóraǵasy Erlan Qarın aıtqandaı, «ulttyq» degen anyqtama ataýynyń ózi telearnanyń bar bolmysyn aıǵaqtaıdy. Ulttyq korporasııa óziniń mereıli 60 jasyna aıaq basyp otyr. Telearnanyń 60 jyldyǵyna arnalǵan «Qazaqstan» – elimizdiń teleepopeıasy: ulttyq arnanyń damý modeli» atty halyqaralyq ǵylymı-tájirıbelik konferensııa men saltanatty sharalar jıyntyǵy keshe ál-Farabı atyndaǵy QazUÝ-de keńinen atalyp ótti.
Keń aýqymdy baǵdarlamaǵa sáıkes, sharalar legi osy ýaqytqa deıin qalyptasqan dástúrmen sabaqtasa kelip, jýrnalıstıka fakýltetiniń janynan ulttyq arnanyń «Qazaqstan» oqý-shyǵarmashylyq zerthanasynyń ashylýymen bastaldy. Buǵan deıin fakýltette «Egemen Qazaqstan» gazeti men «Habar» telearnasy óz zerthanalaryn ashqan bolatyn. Zerthananyń ashylý saltanatynda QazUÝ rektory, akademık Ǵalymqaıyr Mutanov pen «Qazaqstan» RTRK Basqarma tóraǵasynyń birinshi orynbasary Lázzat Júnisova lenta qıyp, televızııa salasynyń maıtalman ardagerleri Qusman Igisinov pen Lasker Seıitov aqsaqaldyq aq batasyn berdi. Bolashaqta bul zerthana zamanaýı talaptarǵa jaýap bere alatyn, aqparat pen sıfrly tehnologııa tilin meńgergen mamandar daıarlaýdyń biregeı ustahanasyna aınalatyny sózsiz. Sondaı-aq L.Júnisova jýrnalıstıka fakýltetindegi televızııa isine mamandanyp júrgen stýdentter úshin jarııalanǵan eń úzdik stýdenttik materıaldardyń bes jeńimpazyna shákirtaqy tabys etti. Budan soń konferensııa qonaqtary men qatysýshylary «Qazaqstandaǵy telejýrnalıstıkanyń damýy men qalyptasýy» atty «Qazaqstan» telearnasynyń 60 jyldyǵyna arnalǵan baspasóz materıaldary, kitap jáne fotokórmeni tamashalady.
Konferensııa qatysýshylaryna ulttyq arnanyń tarıhyn baıandaıtyn beınejazba – derekti fılm kórsetildi. Búginde telearnada mýzyka men estradany nasıhattaıtyn «Men – qazaqpyn», «Hit-Qazaqstan», «Sazger», elimizdiń kórikti jerlerimen tanystyratyn «El ishinde», «24 saǵat tabıǵat qushaǵynda», «Kıeli Qazaqstan», «Uly dala ulaǵaty», sondaı-aq «Alashtyń amanaty», «Tarıhtyń tamyrynda» kórermenge jol tartty. Kópshiliktiń kóńilinen shyqqan aqparattyq-saıası «Apta», «Aqparat», «1 stýdııa», «Meniń Qazaqstanym», «Qareket», «Kelbet», «Jarqyn beıne» syndy derekti, tanymdyq, áleýmettik, rýhanı baǵyttaǵy baǵdarlamalar jalǵasyn taýyp jatyr.
Konferensııa jumysy «Qazaqstan» arnasynyń aǵa býyn ókilderi Qusman Igisinov, Fatıma Begenbaeva, Gúlmarııa Barmanbekova, Mars Omarovtyń jáne búgingi kórermenniń yqylasyna bólenip júrgen Beısen Quranbek, Nartaı Aralbaıuly, Meıirjan Álibek, Baıan Baqkeldi, Almat Ábdiraman, Erlan Atambaı sııaqty jas býynnyń jýrnalıstıka fakýltetiniń stýdentterine arnalǵan sheberlik sabaqtarymen ushtasty.
Aıgúl AHANBAIQYZY, «Egemen Qazaqstan»
ALMATY