Áýlıekól aýdanyna qarasty Moskolev aýylynda meshitte Juma namazyn oqyǵan jamaǵat birden tarap ketpeıdi. Tilek bildirýshiler meshitte qalyp, latyn harpimen jazylatyn jańa álipbıdi úırenedi. Sabaqty aýyl aqsaqaly, bilim salasynyń ardageri Kókenakı Ábildın ótkizedi.
«Áýelde 12 adam latyn álipbıin úıreneıik dep tilek bildirgen edi. Onyń qatary birtindep kóbeıe berdi. Qazir Juma namazyna kelgen aýyldastardyń qataryn mektep oqýshylary men muǵalimderi de tolyqtyryp jatyr» deıdi Kókenakı aqsaqal.
Latyn harpindegi álipbıdi úırenýge sebep bolǵan da Kókenakı aqsaqaldyń ózi eken. Ol aýdandyq gazetke latyn harpimen maqala jazady. Ony oqyǵan aýyldastar kibirtiktep, barlyǵyn jete túsine almapty. Sodan Juma namazyna jınalǵanda maqalada ne jazylǵanyn suraıdy. Sol áńgimeniń aıaǵy «latyn harpindegi álipbıdi úıretińiz» degen usynyspen aıaqtalady.
«Maǵan latyn harpin úırenýdiń, osy álipbımen jazýdyń eshqandaı qıyndyǵy bolǵan joq. Men ertede nemis tilin oqyǵanmyn, barlyǵy uqsas, negizi latyn harpi ǵoı. Al aǵylshyn tilin oqyp júrgen balalar tipti lezde úırenip aldy» deıdi Kókenakı aqsaqal.
Kókenakı Ábildın ómir boıy mektepte qyzmet istedi. Mektepterdi basqardy. Jetpis bestegi aqsaqal aýyldastaryna latyn harpindegi álipbıdi bar yqylaspen úıretip júr.
Názıra Járimbet,
«Egemen Qazaqstan»
Qostanaı oblysy,
Áýlıekól aýdany