Búgin Jańaqorǵan aýdanynda «Agroekspress» oqý semınary uıymdastyryldy. Onda kásipkerlerge aýdannyń týrıstik jáne agroónerkásiptik áleýeti tanystyryldy.
Jańaqorǵan aýdanynyń ákimi Ǵalym Ámireev jáne «Mansap-Qyzylorda» JShS bıznes-treneri Natalıa Mıshýkova shaǵyn jáne orta bıznestiń damýdaǵy áleýeti jaıly aıtty.
Aıta keteıik, «Agroekspress» oqý semınary óńirdegi kásipkerlikpen aınalysýǵa nıetti azamattardy tájirıbe almasyp, naryqtyq qatynastarǵa saı bıznesti damytýdyń joldaryn úıretýge múmkindik beredi.
«Jańaqorǵan aýdany oblysta kásipkerlikti damytý boıynsha kósh bastap tur. О́tken jyly aýdanymyzda «Agro-ındýstrııaldyq aımaq» qurylyp, kásipkerliktiń damýyna jaǵdaı jasalýda. Aýdanda shaǵyn jáne orta bıznesten 3338 sýbekti tirkelse, onyń ishinde belsendisi- 3171 nemese 95 paıyzdan joǵary. Bul aımaqtaǵy eń joǵary kórsetkish. Sondaı-aq, tarıhı eskertkishterge qyzyǵýshylyq tanytqandar úshin týrıstik klasterdi damytý úshin úlken múmkindikter bar. Bıyl bes aýyldyq okrýgte Manap, Qandóz, Tómenaryq, Aqúıik jáne Qaratóbe aýyldyq okrýgterinde ınfraqurylym máselelerin sheshýge jergilikti bıýdjetten «Agroındýstrııaldyq aımaq» qurýǵa qarajat bólinip otyr»,- dedi aýdan ákimi Ǵalym Ámireev.
Esterińizge sala keteıik, oblys ákimdigi, máslıhat, «Nur Otan» partııasynyń fılıaly jáne Qoǵamdyq keńes 2018 jyldy oblys boıynsha «Jappaı kásipkerlikti qoldaý jyly» dep jarııalaý týraly birlesken sheshim qabyldaǵan bolatyn. Jańaqorǵan aýdany alǵashqylardyń biri bolyp aýmaǵy 50 gektar «Agroındýstrııaldyq aımaq» qurǵan. Semınarǵa qatysýshylar agro-ındýstrııaldyq aımaq jumysymen jáne «Jańaqorǵan» shıpajaıymen tanysty.
Kúnniń ekinshi jartysynda tarıhı oryndarǵa saıahat jasaldy. Qatysýshylar «Tólek ata», Qylyshty ata» jáne «Qorasan ata» kesenelerine bardy.
Aıtpaqshy, ótken jyly týrıstik salany damytý maqsatynda tarıhı oryndarǵa baratyn jol tolyq asfalttalǵan. Bolashaqta munda týrısterge arnalǵan «Aqtas» meshiti jáne kórshi Túrkistan qalasyndaǵy Qoja Ahmet Iаssaýı kesenesine barý saıahatyn uıymdastyrý kesheni qyzmet kórsetetin bolady.