Terrorızm men ekstremızmge qarsy memleketter tek qana birlesip kúrese alady. CCTV telearnasyna suhbat bergen Qazaqstan Prezıdenti Nazarbaev osyndaı pikir bildirdi, dep habarlaıdy «QazAqparat».
CCTV telearnasynyń tilshisi Memleket basshysyna suhbatynda 2018 jyldyń qańtar aıynda Qazaqstan tuńǵysh ret BUU Qaýipsizdik Keńesiniń tóraǵasy bolǵanyn atap ótti.
«Qazaqstannyń tóraǵalyq etýi Sizdiń halyqaralyq deńgeıdegi abyroıyńyz ben Qazaqstan dıplomatııasy jetistiginiń arqasy ekeni sózsiz. BUU Qaýipsizdik Keńesiniń tóraǵasy retinde Qazaqstan qaı baǵytqa basymdyq bergeli otyr?» - dep surady telearna tilshisi. Nursultan Nazarbaev jaýabyn Táýelsizdik alǵanyna bar-joǵy 26 jyl tolyp otyrǵanyna qaramastan, Qazaqstannyń Qaýipsizdik Keńesiniń Turaqty emes múshesi retinde saılaný qurmetine ıe bolyp otyrǵanynan bastady.
«О́tken aptada men Nıý-Iorkta bolyp, Qaýipsizdik Keńesiniń otyrysyna tóraǵalyq ettim. Biz ıadrolyq qarýsyzdandyrý men memleketter arasyndaǵy senim taqyrybynda dıskýssııa ótkizdik. Birshama jańa sharalar uıymdastyrdyq. Bizdiń maqsat pen mindet - Ortalyq Azııa aımaǵyndaǵy beıbitshilik pen tynyshtyq úshin jumys júrgizý, Aýǵanstanda tynyshtyq ornamaı turǵandyqtan, ujymdyq turǵyda Aýǵanstanǵa alternatıvti óndiris qurý jolynda qalaı kómestesýge bolatynyn sheship, jaǵdaıdy turaqtandyrý. Sebebi, ol bizdiń kórshimiz», - dedi Prezıdent. Memleket basshysynyń aıtýynsha, Qazaqstan Aýǵanstan arqyly Pákistanǵa, Úndistanǵa shyǵa alady.
«Alaıda ishki qaýipsizdiktegi (Aýǵanstanda - avt.) álsizdik munaı-gaz qubyrlary men avtokólik joldarynyń ótýin qamtamasyz ete almaı otyr. Sondyqtan, Aýǵanstannyń ishinde turaqtylyq ornatýda bizdiń múddemiz ortaq. Biz osy baǵytta jumys júrgizdik», - dedi Elbasy. Nursultan Nazarbaev Qazaqstan qazirgi tańda osy jumysty atqaryp otyrǵanyn maqtan tutatynyn aıtty.
«Ol óte joǵary baǵalanyp jatyr. Qazaqstannyń bastamasymen BUU-ǵa múshe barlyq memleketterdiń ókilderi Kabýlǵa baryp, el ishindegi jaǵdaıdy zerdelep qaıtty. О́kinishke qaraı, sońǵy jyldary álsirep qalǵan memleketter arasyndaǵy senim máselesi terrorızm men ekstremızmge qarsy kúres baǵytynda óte mańyzdy. Onymen tek qana birlese kúresýge bolady. Árbir memleket jeke-jeke kúrese almaıdy. Terrorızm - qaı jerde bolmasyn bas kóteretin zulymdyq. Onyń maıdanynda eshqandaı shekteý joq. Qashan jáne qaı jerde burq ete túsetinin bilmeısiń... Sondyqtan, memleketterdiń arnaıy qyzmetteriniń baılanysy óte mańyzdy. Mine, osy baǵytta biz jumys júrgizip jatyrmyz», - dedi Nursultan Nazarbaev.