Efıopııada saıası daǵdarysqa baılanysty premer-mınıstr Haılemarıam Desalen qyzmetinen ketip, elde tótenshe jaǵdaı jarııalandy, dep habarlaıdy Habar 24 telearnasy.
Sheshimdi bılik basyndaǵy «Efıopııa halqynyń revolıýsııalyq-demokratııalyq maıdan» odaǵy jarııalady. Ázirge onyń qansha ýaqytqa sozylatyny belgisiz. Al saıası daǵdarysqa qańtar aıynan beri túrmedegi saıası tutqyndardy azat etýdi talap etken ereýilder men sherýler sebep boldy. Jyl basynan beri 6 myń adam bostandyqqa jiberildi. Al jalpy úkimetke qarsy tolqýlar 2015 jyldan beri jalǵasyp keledi. Oǵan bıliktiń el astanasy Addıs-Abeba aýmaǵyn oromo sharýalary jeriniń esebinen ulǵaıtý jospary túrtki boldy. Keıin narazylyqqa amhara taıpasynyń ókilderi qosyldy.
«Premer-mınıstrdiń keı máselelerdi ózgertýge múmkindigi boldy. Biraq bıleýshi partııanyń yqpaly kúshti bolyp, soǵan táýeldi edi. Sondyqtan onyń otstavkasy durys sheshim dep oılaımyn», - deıdi saıası sarapshy Hallelýıa Lýlıe.