JYLÝ MAÝSYMY JYL BOIY NAZARDA
Qar jaýyp, kún sýytqan saıyn qala turǵyndaryn bıylǵy qys qalaı bolar eken, úıimiz jyly, ystyq sýymyz úzilmeı, apatty jaǵdaılar oryn almaı ma degen suraqtar mazalaıtyny sózsiz. Oblys ákimdiginiń bıylǵy jylǵy 28 sáýirdegi qaýlysymen turǵyn úı-kommýnaldyq sharýashylyq basqarmasynyń qys maýsymyna daıyndyq jónindegi is-sharalary bekitilip, arnaıy jumys toby qurylǵan bolatyn. Qys shanasy jaz saılandy ma, kún tártibinde turǵan jylý maýsymy qazir qalaı júrgizilýde?
«Egemen Qazaqstannyń» Pavlodar oblysyndaǵy tilshisi Farıda Byqaı oblystyq energetıka jáne kommýnaldyq sharýashylyq basqarmasy bastyǵynyń orynbasary Serik Kóshimbaevqa:
– Siz buǵan ne deısiz?
– Jalpy, qys aılaryna daıyndyq barysynda oblystaǵy jylý beretin stansalarǵa kúrdeli jáne aǵymdyq jóndeýler júrgizildi. Olardyń qatarynda 6 energııa blogy, 14 jylý qazandyǵy, 4 týrbına jáne 2 týrbogenerator bar. Bıylǵy jyldyń qazan aıynan bastap barlyq jylý elektr stansalary jylý berý maýsymynyń jumys kestesine kóshti. Bul úderis maýsym boıy nazarda bolady. Barlyq stansalarda kómir jáne mazýt qory jetkilikti.
Bizdiń basqarma tarapynan oblystaǵy barlyq nysandardyń jylý maýsymynda úzdiksiz jumys isteýi, ıaǵnı energııa kózderi, stansalardyń jaǵdaıy, kómir jáne mazýttyń esebi boıynsha kestesi, jylýmen, elektrmen, sýmen jabdyqtaý jáne sý jelilerindegi apatty jaılardyń oryn alǵan-almaǵan jaılary kúndelikti monıtorıng arqyly baqylanady. Jylý berý maýsymyna oraı oblystaǵy 2258 turǵyn úı, 621 mektep, 410 densaýlyq saqtaý oryndary jáne basqa da 257 áleýmettik nysandar daıyndyq jolyna qoıylǵan bolatyn.
Qazirgi kezde olardyń barlyǵynda jylý júıeleri qalypty jumys istep tur. Aı saıyn qala shaǵyn aýdandarynda turǵyndarmen jıyndar ótkizilip, olarǵa kórsetilgen kommýnaldyq qyzmetter úshin der kezinde aqy tóleý qajettigi jáne turǵyndar arasynda bar bereshekti óteý máselesi boıynsha túsindirý jumystary júrgiziledi. Osyndaı is-sharalar nátıjesinde kommýnaldyq qyzmetterge bereshek 40%-ǵa tómendep otyr.
Pavlodar oblysy.