Elbasymyzdyń ár jylǵy Qazaqstan halqyna Joldaýlary týraly osylaı dep nyq senimmen aıtýǵa bolady.
Alysqa barmaı-aq byltyrǵy «Qazaqstannyń úshinshi jańǵyrýy: jahandyq básekege qabilettilik» dep atalǵan Joldaýy men «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty bıylǵy Joldaýynyń ataýlary ǵana emes mazmundary da sonshalyqty qabysyp, birindegi is-qımyl dınamıkasy ekinshisinde jalǵasyp, jańa mazmun, mindettermen baıytylyp, ıgilikke ulasýda ekeni zerdelegen janǵa qolǵa ustatqandaı kórinip tur. Byltyr ekonomıkalyq-áleýmettik damýdyń alty basym baǵyty boıynsha judyryqtaı jumyla jumys jasaý lazym bolsa, bıyl olardy saqtaı otyryp kúsh-jigerimizdi negizgi on mindetti oıdaǵydaı júzege asyrýdyń tóńiregine toptastyrmaqpyz. Mindet naqtylyǵy men is-qımyl birligi Elbasymyzdyń tuńǵysh Joldaýynan beri elimizdi órkenıetti elder kóshine ilesýge bastap, búginde onyń bel ortasynan oryn alyp, taıaý bolashaqta alǵy lektegi otyzdyqtyń qatarynan tabylýdy kózdep otyrmyz.
Áńgime qozǵalys, damý jaıly bolǵannan keıin Mańǵystaý oblysy óńirinen birer mysal keltireıin. Máselen, bizdiń Mańǵystaýdyń kúni keshege deıin bir qıyrda jatqan shet ólke sanalyp kelgenin kónekózder umyta qoıǵan joq. Oblys qaıta qurylǵan 1990 jylǵa deıin Aqtaýǵa Atyraýdan kúnine bir poıyz, Almaty men Aqtóbeden jáne Máskeýden tirkemeli bir vagon qatynaıtyn. Ushaqtar sany da bir qoldyń saýsaǵyndaı edi... Al búginde Astana men Almatydan, Aqtóbe men Atyraýdan, Beıneýden kúnine jolaýshy poıyzy kelip-ketip jatady. El ishindegi jáne halyqaralyq jolaýshy ushaqtaryn qabyldap, jóneltý jaǵynan Aqtaý halyqaralyq áýejaıy Astana men Almaty áýejaılarynan keıingi úshinshi orynda tur. Al Elbasynyń alǵashqy Joldaýynda aty atalyp, ınvestısııa tartylatyn kásiporyndar sanatyna engizilgen «Aqtaý halyqaralyq teńiz-saýda portynyń» qaıta qurylyp jasaqtalýymen Mańǵystaý el ekonomıkasy úshin ǵana emes halyqaralyq deńgeıdegi kólik-logıstıkalyq ortalyqqa aınaldy. Shyǵys pen Batys, ıaǵnı TRASEKA, Ońtústik-Soltústik kólik dálizderiniń urymtal tusynda turǵan Mańǵystaýdyń tranzıttik qyzmetine dilgerler qatary jyl ótken saıyn arta túsetini sózsiz.
Beıneý – Jezqazǵan, «О́zen – Túrikmenstanmen memlekettik shekara» temir jol jelisi de kezinde Elbasy joldaýlarynan tin tartyp, búginde eldiń ıgiligine aınaldy. Oblysishilik jáne respýblıkalyq avtojoldardy jóndeý men qaıta salý, baılanys-kommýnıkasııa salasyn osy zamanǵy tehnologııalarǵa kóshirý jóninen de ushan-teńiz jumystar atqarylýy da osy Elbasy joldaýlary arqyly arnasyn tapqan ıgilikter.
Joldaýlardyń jaqsylyǵyn tek kólik-logıstıkalyq saladan emes, árbir saladan tabýǵa, kórýge bolady. Sonyń biri – mádenıet salasy. Demek, joldaý aıasynda tynys-tirshiligin utymdy úılestirip, damý jolyna túsken Aqtaýdaǵy teatr jaıyn aıtpaı ketýge bolmaıdy.
Nursultan Ábishulynyń ár jylǵy joldaýlarynyń birinde azyraq, birinde kóbirek, biraq mindetti túrde mádenıet pen ónerdiń ultymyzdyń ekonomıkalyq, rýhanı-áleýmettik áleýetin arttyrýdaǵy ornyna aıryqsha mán berilip keledi. Bul joly da ulttyń áleýeti men mádenı damýyn sabaqtastyra qarap, rýhanı jańǵyrýdyń mán-mańyzy da osynda ekendigin atap kórsetipti.
Bizdiń N.Jantórın atyndaǵy Mańǵystaý oblystyq mýzykalyq drama teatrynyń ujymy da byltyrdan beri elimizde memlekettik deńgeıde júzege asyrylyp jatqan «Rýhanı jańǵyrý» baǵdarlamasy aıasynda kásibı mindetterimizge sáıkes shyǵarmashylyqpen eńbek etýde. Osy turǵyda byltyrǵy jylǵy N.Saýdanbekulynyń «Álıhannyń amanaty» rekvıemi, T.Temenovtiń «Aqqýdyń kóz jasy» lırıkalyq dramasy, S.Adaıdyń «Úreı derti» ápsanasy men D.Isabekovtiń «Eski úıdegi kezdesý» dramasy sekildi sahnalyq qoıylymdardyń tusaýkeserleri kórermenderdiń zor qyzyǵýshylyǵyn týǵyzyp, qoshemetine ıe boldy.
Orys trýppasynyń jumysy jandanyp, M.Zadornovtyń «Prodaıte mýja» atty komedııasy anshlagpen júrýde.
Qazaq teatr óneriniń jetistikterin nasıhattap, kórshiles eldermen mádenı baılanystardy nyǵaıtý maqsatynda ótkizilgen Qazaqstannyń Eńbek Eri Asanáli Áshimovtiń 80 jyldyǵyna arnalǵan Kaspıı jaǵalaýy elderiniń Birinshi halyqaralyq festıvali de mereıimizdi ósirip, rýhanı órisimizdi keńeıte túsken óreli shara boldy. Halyqaralyq TÚRKSOI uıymymen birlesip ótkizgen bul festıvalǵa bes memleketten alty teatr qatysyp, bes tilde óner kórsetti. Sonymen birge festıval aıasynda TÚRKSOI-ǵa múshe elderdiń memlekettik teatr qaıratkerleriniń basqosýy bolyp, teatr ónerin damytýdyń ortaq máseleleri talqylanyp, mindetter saralandy.
Túrkııanyń Trabzon qalasynda ótken Qara teńiz jaǵalaýy elderi teatrlarynyń dástúrli festıvaline arnaıy shaqyrýmen qatysyp, biz usynǵan Ý.Shekspırdiń «Gamlet» tragedııasyna túrik kórermenderi men áriptesterimiz joǵary baǵa berip, marapatqa ıe boldyq. Halyqaralyq deńgeıdegi mundaı aralas-quralastyqtyń kásibı sheberlikti shyńdaýǵa da tıgizer paıdasy mol.
Jańa jyldy naqty mindettermen bastap otyrmyz. Bıyl teatrymyzdyń qurylǵanyna 15 jyl tolyp, ózimiz atyn abyroımen alyp kele jatqan qazaq sahna óneri men kınosynyń sańlaǵy N.Jantórınniń 80 jyldyǵyna arnalǵan respýblıkalyq teatr festıvalin ótkizbekpiz. Esepti gastroldik saparlarmen Astanadan bastap elimizdiń birqatar oblystarynda óner kórsetip, naýryz aıynda Belarýs respýblıkasyndaǵy teatr festıvaline qatysamyz. «Rýhanı jańǵyrý» baǵdarlamasy sheńberinde aldaǵy jyly ótkizý josparlanǵan Birinshi halyqaralyq «ÁBISh ÁLEMI» festıvaline ázirlik jumystary da bastalyp ketti. Bizdiń bastamalarymyzǵa árdaıym qoldaý kórsetip kele jatqan oblys ákimdiginiń kelisimimen Jańaózen qalasynda oblystyq teatrdyń fılıalyn ashýǵa jan-jaqty daıyndyqqa kiristik. Josparly premeralardyń qamy óz aldyna, kórermendermen baılanystardy jetildirip, arnasyn keńeıtý maqsatyndaǵy jumystarǵa jańasha serpin berýge tıispiz. Elbasy Joldaýy, ýaqyt talaby bizdi osyǵan mindetteıdi.
Nurnııaz MUHANOV, Qazaqstan Respýblıkasynyń eńbek sińirgen qaıratkeri
Mańǵystaý oblysy